Ish-kryeministri i Shqipërisë dhe ish-kryetari i Partisë Socialiste, Fatos Nano, po përballet sërish me probleme serioze shëndetësore. Burime për Top Channel bëjnë me dije se prej rreth dy javësh, Nano ndodhet i shtruar në repartin e reanimacionit të një spitali privat në Tiranë.
Gjendja e tij shëndetësore është përkeqësuar si pasojë e rikthimit të një sëmundjeje kronike respiratore, e njohur në mjekësi si SPOK (Sëmundje Pulmonare Obstruktive Kronike). Kjo nuk është hera e parë që lideri historik i së majtës shqiptare përballet me komplikacione të tilla, pasi edhe më herët ai është intubuar për shkak të vështirësive në frymëmarrje.
Rreth gati një vit më parë, Nano pësoi gjithashtu një frakturë në këmbë pas një rrëzimi, ngjarje që ndikoi negativisht në shëndetin e tij të përgjithshëm.
Aktualisht, nuk ka një deklaratë zyrtare nga familjarët apo përfaqësuesit e tij lidhur me gjendjen shëndetësore, ndërsa mediat raportojnë se mjekët po e mbajnë nën vëzhgim të rreptë dhe në trajtim intensiv.
Fatos Nano ka qenë një nga figurat më të rëndësishme politike të tranzicionit në Shqipëri, duke drejtuar Partinë Socialiste për më shumë se një dekadë dhe duke shërbyer disa herë si kryeministër i vendit. Për çdo detaj të ri, artikulli do të përditësohet.
