Motrat e famshme të modës, Bella dhe Gigi Hadid, kanë zbuluar së fundmi ekzistencën e një gjysmë-motre të panjohur më parë, Aydan Nix, përmes një deklarate ekskluzive për “Daily Mail”. Por ky zbulim nuk është i vetmi detaj befasues që lidhet me familjen Hadid, e cila rezulton të jetë e ndërthurur në mënyrë të pazakontë me figurat më të mëdha të botës së showbiz-it.
Aydan, 23 vjeçe, e lindur nga një marrëdhënie e shkurtër që Mohamed Hadid pati para shumë vitesh, është diplomuar në “Parsons School of Design” në Manhattan dhe ka jetuar në Orlando të Floridës. Sipas burimeve, ajo u takua për herë të parë me Gigi-n dhe Bella-n më pak se dy vite më parë gjatë studimeve të saj jashtë vendit në Paris – dhe prej atëherë është bërë pjesë e pandashme e jetës së tyre. Vajzat janë parë së bashku në dalje në New York, plazhe, dhe evente të ndryshme.
“E kemi pranuar me zemër të hapur këtë surprizë të bukur në familjen tonë”, thanë Bella dhe Gigi në deklaratën e tyre.
Mohamed Hadid, tani 76 vjeç, sipas “Daily Mail”, ruan një marrëdhënie private me Aydan-in, por nuk e ka pranuar kurrë publikisht atësinë e saj.
Lidhje të befasishme familjare në botën e showbiz-it
Përtej Aydan-it, familja Hadid është e ndërlikuar në mënyra të pabesueshme me yje të njohur të Hollivudit. Motrat Gigi, Bella dhe vëllai i tyre Anwar kanë lidhje familjare me figura si Elvis Presley, Caitlyn Jenner, Kylie Jenner dhe madje edhe familjen Kardashian.
Në zemër të kësaj “rrjete yjesh” qëndron David Foster – producent i njohur muzikor dhe ish-bashkëshort i Yolanda Hadid, nëna e Gigi-t dhe Bella-s. Ai është quajtur madje “Pacienti Zero i fenomenit Kardashian”, për shkak të lidhjeve të shumta që lidhen përmes martesave të tij të shumta dhe ndikimit në rrethin e showbiz-it.
David ka qenë i martuar me Linda Thompson, ish-partnerja e Caitlyn Jenner dhe njëkohësisht ish-e dashura e Elvis Presley në vitet ‘70. Nga martesa e Lindës me Caitlyn Jenner kanë lindur Brandon dhe Brody Jenner – të cilët e lidhin në mënyrë të tërthortë familjen Hadid me familjen Jenner.
Për më tepër, Yolanda Hadid ishte e martuar me Mohamedin nga viti 1994 deri më 2000, periudhë në të cilën lindi Gigi, Bella dhe Anwar. Më vonë, ajo u martua me David Foster në vitin 2011, duke forcuar edhe më tej lidhjet mes familjeve Hadid dhe Foster.
Një histori që shtrihet deri tek Elvisi dhe Kardashianët
Për të shtuar edhe më shumë intrigë, është zbuluar se Robert Kardashian, babai i Kim, Kourtney, Khloé dhe Rob Kardashian, ka pasur një lidhje romantike me Priscilla Presley, ish-bashkëshorten e Elvisit. Ndërkohë, Linda Thompson, e cila ka qenë e lidhur me Elvisin, është gjithashtu pjesë e kësaj “sagë” familjare.
Në një intervistë për CNN në vitin 2002, Linda pranoi se ndikimi i Elvisit kishte qenë i thellë në jetën e saj:
“Ai pati një ndikim të jashtëzakonshëm në jetën time në mënyrën se si kuptoj dashurinë, martesën dhe familjen.”
Ndërkohë, Gigi Hadid është bërë nënë në vitin 2020 me partnerin e saj të atëhershëm, këngëtarin Zayn Malik, me të cilin ka një vajzë të quajtur Khai.
Ky rrjet kompleks familjar midis Hadid-ëve, Jenner-ëve, Presley-ve dhe Kardashian-ëve tregon se në botën e famës, lidhjet janë më të ndërlikuara se sa duken në pamje të parë dhe se surprizat familjare nuk kanë mbarim.
