Era Istrefi është zgjedhja më e mirë që do të bënte Shqipëria për t’u përfaqësuar në festivalin evropian të këngës. Të paktën kështu shkruan faqja zyrtare e Eurovizionit, Wiwibloggs, kur përmend disfatat e Shqipërisë vit pas viti.
Që nga debutimi në vitin 2004, e deri këtë vit, Shqipëria ka qenë disa herë në finalen e festivalit që shpesh kontestohet nëse është i mirë dhe me vlera.
Me Rona Nishliun, Shqipëria morri pozitën e pestë në finalen e vitit 2012-të, ndërsa me këngëtarët tjera ka marrë pozicione më të dobëta, disa herë as në finale.
“Megjithatë, Eurovizioni tek shqiptarët ka sjellë rezultate të dobëta. Disa thonë që Festivali i Këngës në Radio Televizionin Shqiptar është i dalë mode. Të tjerët thonë se tendenca për të ndërruar versionet e këngëve fituese po i dëmton ato. Çka nëse ndërrojmë praktikë dhe e dërgojmë Era Istrefin për Shqipërinë në Eurovizion”, shkruan sot Wiwibloggs, një prej platformave më të mëdha të festivalit në Evropë dhe e cila përcillet gjatë tërë vitit, jo vetëm kur mbahet Eurovizioni, për analiza dhe për lajme rreth këngëtarëve që marrin pjesë në këtë garë muzikore.
“Vetëm nëse keni jetuar poshtë gurëve, sepse sigurisht e keni dëgjuar “BonBon”. Kënga i solli famën Era Istrefit, bëri që ajo të nënshkruajë me Sony Music dhe të krahasohet me emrat si Rihanna dhe Sia” vazhdon shkrimi i Wiwibloggs.
Wiwibloggs e risjellë biografinë e Erës, një vajzë në të 20-tat e saj, nga Prishtina, me disa çmime muzikore në Kosovë e Shqipëri dhe me këngët e saj që kanë miliona klikime në Youtube.
“Kjo këngëtare është diçka e re. Me stilin pak si Rihanna dhe Zara Larsson, Era do të mund të bënte shumë për Shqipërinë në Eurovizion. Këngët e Shqipërisë në Eurovizion shpesh janë bajate” shkruan sot Wiwibloggs, derisa edhe paraqet disa këngë të Erës për ti bindur lexuesit se ajo do të mund të ishte idealja për një fitore shqiptare në Eurovizionin e ndjekur nga miliona njerëz nga mbarë bota, madje edhe nga Kina, Australia e Amerika.
Shkrimi tregon se Era është edhe mbretëreshë e rrjeteve sociale, çka luan rol në një pjesëmarrje të saj të mundshme në Eurovizion.
