Me Estela Ujkën, ishte më shumë se një intervistë, ishte një aventurë! Nga ato që të mbeten në mendje të gjitha bisedat që zhvillon rrugës për në destinacion. Kujtimet e Parisit për bashkëpunimin me markën e bukurisë franceze na i kujtoi gjatë gjithë udhëtimit tonë për të realizuar fotografitë e intervistës me Elusin. “Kanë një kulturë kaq ndryshe të të respektuarit të imazhit të femrës”, ishte një ndër fjalitë që më mbeti në mendje, pasi Estela më tregoi disa raste të veçanta të sjelljes së meshkujve parisien.
Blogerja e modës është një imazh i njohur për stilin e saj të guximshëm dhe të veçantë. Ju kujtohet kur guxoi vitin e kaluar duke qethur flokët? Tashmë Estela veç blogut mund të quhet pa frikë edhe: “Influencuese mode”.
Mua më ka ndodhur që të kontrolloj profilin e saj për të gjetur një ide për kombinim e ditës në mëngjes, para se të nisem për punë. Apo cilat janë aksesorët më në modë! Estela është gjithmonë e gatshme të na jap këshillat e fundit.
Si pasion, për të besojmë se është e pamundur të qëndrojë pa folur për modën. Fundi me tyl e dimë që është trendi i fundit! Por ashtu si mua, mund t’ju ketë shpëtuar trendi më i ri i kombinimit të tij me pantallona xhinse. Ndërsa më tregonte gabimin që s’duhet të bëjmë (mos zgjidhni KURRË një fund të shkurtër), Estela më tha se jo të gjithë personazhet publike kanë ditur ta sjellin këtë trend, pa u dukur “pa shije”. Moda, ashtu si Estela, mendoj se shpesh është e lindur! Por nuk ka asgjë të gabuar që të frymëzoheni nga ato që dinë.
“Merr shembull nga Estela shiko sa bukur që vishet!”. Këtë batutë 35-vjeçarja ma kujtoi nga një episod në fëmijërinë e saj, mes nënës së shoqes. Dhe unë prej kohësh jam e gatshme të marr shembull prej saj!
Estela dhe Moda
Isha kurioze të mësoja si lindi kjo “marrëdhënie dashurie” mes saj dhe modës. Estela më tregon se i ka fillesat që në fëmijëri:
“Mendoj se interesi për modën ka lindur me mua, e mbaj mend veten fare të vogël që shpenzoja orë të tëra mbi takat e tezës në Shkodër apo nuk kam lëvizur qerpikun kur gjyshja më shpoi veshët për herë të parë nga dëshira për të mbajtur vathë. Më pas në tetëvjeçare mund të më gjeje deri ne 2:00 të natës duke vizatuar veshje, ishin vitet ‘90 kur pata kontaktin e parë me revistat e modës, kryesisht ato italiane, të cilat i kam ruajtur deri vonë si thesare dhe vitet 2000 përcaktuan stilin tim duke qenë 5 vjet në televizion. Ky rrugëtim nuk mund të mos konkretizohej me një blog mode në vitin 2012, fill pas lindjes së vajzës së dytë Sharmin”.
Kush ka qenë ikona juaj e parë e stilit? Dhe cilën veçoni tani?
Duhet ta pranoj që ikona e parë e stilit ka qenë Ambra e “Non e la Rai”, më pas do të ndikoheshim nga “Bayside School” apo “Beverly Hills”. Nuk kam qenë kurrë fanse e Britney Spears.
Sot nuk mund të veçoj një pasi ka vërtet shumë modele dhe personazhe që të frymëzojnë çdo ditë. Por mund të them që profilet e atyre që kontrolloj me shpesh në “Instagram” janë Olivia Palermo, Mira Duma, Caroline de Maigret. Ndërsa ikonë të përjetshme e të pazëvendësueshme të stilit konsideroj Audrey Hepburn.
Si është për Estelen të jetë një influencuese mode?
Për mua është një lojë e bukur, të cilën e bëj me shumë pasion dhe që duhet ta pranoj më mban në formë dhe të përditësuar. Me thënë të drejtën ndjen një sadisfaksion të madh kur le të themi për disa mama apo vajza, që kohën e kanë të limituar je kthyer në një fare guruje mode dhe inspirohen thjesht duke “scrollur” fotot në “Instagram” apo e marrin informacionin më thjeshtë.
Në Shqipëri është theksuar së fundmi biznesi i të qenit një influencuese, partneriteti me markat! A realizohet në mënyrën e duhur nga të famshmit shqiptarë?
Pushteti i sociales apo i dixhital marketing është i pamohueshëm ndaj sa më parë ta kuptojnë kompanitë aq më mirë do jetë për promovimin e tyre. Të famshmit shqiptarë mendoj se janë në një periudhë konfuze, sesi duhet ta përdorin hapësirën e tyre në mediat sociale. Përsa kohë në Shqipëri kompanitë shqiptare nuk matin trafikun që sjell një influencues apo të shitjeve të suksesshme është e pamundur të matësh efektin real të një postimi ndaj gjithçka, që do marrësh parasysh janë numrat e ndjekësve apo klikimet e një uebsajti, që në të shumtën e rasteve janë të manipuluara. Vetë personazhet që marrin përsipër promovimin në mediat sociale duhet të jenë pak të kontrolluar kur vendosin të identifikohen me një produkt pasi në fund humbin besueshmërinë te ndjekësit e tyre, nëse postojnë pa asnjë kriter vetëm për reklamë.
Vështirësitë e të qenit blogere në Shqipëri…
Mendoj se vështirësia e parë që hasin blogeret shqiptare është fakti që shumica e kompanive ende janë skeptikë të ndikimit që ka marketingu dixhital apo ai social. Blogeret nuk janë menaxherë shitjeje, por influencuesë dhe shitja e tyre nuk është shitje direkte. Ndaj t’i matësh efektin është pak e vështirë për kompanitë. Unë mendoj që jemi në fillimet e kësaj industrie dhe jemi duke shkruar rrugën ndaj bashkëpunimet po vijnë gjithnjë e në rritje. Gjithë statistikat thonë se përqindja më e madhe e kohës shpenzohet në telefon, ndaj është e pashmangshme që dhe promovimi të realizohet aty.
Estela e bën vetë makijazhin
Ndoshta mund të duket e pabesueshme për një blogere, e cila është gjithë kohën nëpër evente të rëndësishme apo e ftuar në emisione, por Estela kujdeset vetë për imazhin e saj.
Gjithçka që mban emrin tuaj është e kuruar deri në detajin më të vogël. Sa persona kujdesen për imazhin dhe look-un në tërësi të Estelës?
Deri tani jam munduar të kujdesem vetë për çdo detaj dhe me thënë të drejtën për arsye kohe nuk jam as kliente e rregullt e salloneve të estetikës. Pra, më duhet të pranoj që flokët dhe make-up-i janë gjithmonë përgjegjësia ime, ndërsa për blerjet deri tani jam skllave e blerjeve online dhe më pak të atyre në vend. Për aksesorët kam bashkëpunëtorë të mirë të cilët më kanë vënë në dispozicion gjithë koleksionet e reja.
Cila është gjëja më me vlerë që more nga eventi i “Lierac Paris”, ku ishin pjesëmarrëse disa blogere nga gjithë bota?
Mendoj se gjëja më e rëndësishme e këtij bashkëpunimi ishte titulli “Ambasadore e Lierac dhe Phyto” për Shqipërinë për 1 vit, përsa i përket eventit ishte i gjithi “Premium” në gjithë dimensionet ndaj çdo detaj do të mbetet i pashlyeshëm në memorien time. Diçka me vlerë që mësova nga kjo eksperiencë është që dhe një blogere nga një vend i vogël si Shqipëria mund të arrijë gjëra të mëdha nëse impenjohet dhe vendos pasionin në atë që bën.
“E para që solli stilin “oversized”
Një nga trendet e momentit që vazhdon edhe këtë vit janë veshjet “oversized”. Këtë trend në Shqipëri e përqafoi ndër të parat Estela dhe vazhdon të jetë “partizane” e tyre.
Vini gjithmonë me stil të ri në veshje, cili është trendi risi që veçoni se sollët në vendin tonë?
Mendoj se kam qenë partizane e shumë trendeve për t’i sjellë në kohë dhe në Shqipëri, por mendoj se stilin “Oversized” e kam përqafuar ndër të parat dhe mendoj se shumë persona ende e identifikojnë me mua apo që e kanë parë në “sharminstyle”. Po mundohem shumë që ndërkohë koleget e mia të heqin çorapet e holla të shkurtra në dimër, që është një budallallëk blogeresh, por sakrifica për pamjen dhe këto. Së fundmi jam përqendruar të edukoj shijet me stilin francez “ujë dhe sapun”, mendoj se do t’ia arrij ta sjell si frymë apo kulturë, për të balancuar trendin Kardashian.
Zhveshja dhe stili i të rinjve shqiptarë nga syri i Estelës
Dhe meqë Estela më kujtoi “stilin Kardashian”, mendoj se mund të lidhim me to trendin e zhveshjes. Në fakt fenomeni i kërkimit të vëmendjes është i pashmangshëm. Po përse të famshmet shqiptare e kërkojnë vetëm përmes “zhveshjes”?
Sepse është rruga me efikase! (qesh) Mënjanë shakave unë nuk gjykoj asnjë personazh që zhvishet për vëmendje, është e drejta e tyre. Por duhet të kuptojmë që nuk është rruga e vetme.
Është përmirësuar apo ekzagjeruar stili i të rejave shqiptare?
Mendoj se sot ka shumë të rinj që vishen tmerrësisht shume bukur, por këta janë ende pakicë në vendin tonë. Shumica e të rinjve shqiptarë janë të orientuar nga modelet e ekzagjeruar e me gjëra false, të cilat unë nuk i aprovoj.
“Shqiptarët nuk mashtrohen nga produktet false”
Si mendoni se ka ndryshuar marrëdhënia e shqiptarëve me markat luksoze dhe cilësore?
Mendoj se ka ndryshuar për mirë (buzëqesh). Tashmë asnjë shqiptar nuk mund të mashtrohet më duke blerë një produkt fals, si origjinal. Ka aq shumë informacion në internet mbi “brandet” dhe një pjesë e mirë e tyre kanë ardhur në Shqipëri me dyqane “multibrand”, sa më duket e pafalshme nëse dikush mashtrohet ende. Politika e markave tashmë është më afër masës duke hequr dorë nga logot shumë të mëdha dhe identifikuese, vetë markat kanë futur politikën e miksimit të produkteve për t’u bërë më të prekshme, kjo dhe me bashkëpunime me markat popullore. “Balmain”, “Kenzo” apo së fundmi Victoria Beckham të gjithë kanë projekte apo koleksione me brande popullore. “Sëmundja” e markave luksoze për të cilat biem në kompromisin të marrim një false apo të kemi të ardhura të pajustifikuara, duket se nuk të ngre në stadin e dëshiruar vetëm të dëmton më shumë imazhin dhe brendësinë.
Stili është një komunikim shumë i rëndësishëm. Cila janë këshillat e modës të Estelës?
Këshillat e modës shumë shpesh ngjajnë me këshillat e jetës, duket për të qeshur, por është e vërtetë. Duhet të jemi origjinale dhe vetvetja dhe në komunikimin nëpërmjet stilit. Gjithçka fillon nga dashuria dhe respekti për veten. Unë mundohem të jem e sillem ashtu siç e ndjej dhe këtë e komunikoj dhe me pamjen, duke i qëndruar besnike ndjesive të mia.
“Partneri më kritikon për veshjet”
Po partneri çfarë mendon për stilin tuaj? Ju ofron këshilla?
Partneri im është shumë kërkues në paraqitjen e jashtme dhe gjithë kohën ndihem e sfiduar me të. Ai është kritiku im më i besuar, me të cilin debatojmë shumë shpesh për stilin, pasi nuk aprovon çdo gjë timen, por ama është dhe partneri më i kujdesshëm, i cili vë re çdo detaj dhe nuk të kursen komplimentet kur vjen afër shijeve të tij.
Ndërsa kthehemi në fillimin e lidhjes suaj me Lencin, a ishte paraqitja e jashtme “arma” për ta bërë për vete? Detaj tjetër me të cilin e keni tërhequr…
Unë nuk kam bërë asgjë për t’i pëlqyer Lencit, madje mund të them që jam munduar shumë ta largoj nga vetja … Por duket se nuk ja kam arritur (buzëqesh).
Dashuria e Estelës, që u vulos vetëm me buzë
Historia juaj e dashurisë mund të themi se është nga ato që kemi lexuar në romane. Si personazh kryesor, si e përshkruan atë?
Historia jonë e dashurisë nisi me një gënjeshtër më pas lindi një ndjenjë e fortë dhe e vërtetë për të cilën nuk gënjenim dot më. Ishte një histori e pamundur, e cila s’mund të kishte një fund të mirë, por ne nuk hoqëm dorë dhe pse i kishim të gjithë kundër. Të vetëm dhe të dashuruar i premtuam njëri- tjetrit të ishim bashkë derisa vdekja të na ndante, e për këtë nuk na duhej prift, as xhami, por vetëm buzët tona që e vulosën si betim. Në të vërtetë ka pasur shumë dhimbje dhe lot, ndarje e sakrifica, por në fund mendoj se ia ka vlejtur pasi është nga ato historitë e dashurisë që nuk përfundojnë .
Mesazhi më i bukur i dashurisë që u jep shpesh dy vajzave…
Vajzave të mia i mësoj çdo ditë të duan veten dhe të jenë të sinqerta me veten e tyre, mendoj se ky është dhe sekreti i lumturisë.
Burimi: Iconstyle.al
