Të përfaqësosh një shtet në festivalin më të madh europian, Eurovision, do të thotë të mbash një përgjegjësi të madhe mbi supe. Edhe pse kjo eksperiencë është unike dhe shumë këngëtarëve ju vjen vetëm një herë në jetë, është në të njëjtën kohë një nga momentet më të vështira të karrierës për ta. Këtë gjë e ka konfirmuar së fundmi edhe Eneda Tarfia, teksa ka qenë e ftuar në emisionin “Soiree”.
Mesa duket Eneda nuk ka dalë e kënaqur me paraqitjen skenike të saj dhe nënvizoi një detaj ku sipas së cilës mund ta ketë penalizuar. Sipas saj, fakti që u prezantua në Eurovizion me këngën në gjuhën angleze mund edhe ta ketë pësuar
“Nëse më përpara qëllimi ishte të fitoje festivalin vetëm si festival, tani është që të mendosh një element që të pëlqehet në Eurosong. Shpeshherë ka qenë edhe tek modifikimi. Unë e kam pësuar tek modifikimi i materialit për shembull. Nëse do të kisha shkuar me atë material siç e kisha në fillim, besoj se do të ishte shumëherë më e mirë. Atë vjet që mora pjesë ishte një politikë që duhet të ishim më të bashkuar. Dhe ata kanë direktivat e tyre, që të kenë pak më shumë këngë në anglisht le të themi. Prandaj ndodhi. Nëse do më jepej prap mundësia për të zgjedhur do të shkoja me versionin shqip”, u shpreh Eneda.
Gjithashtu ajo theksoi se pas festivalit pësoi një traumë, që është shumë e zakonshme për artistët që shkojnë në Eurovision.
“Unë nuk kam probleme të shkoj prapë. Unë herën e dytë kam përshtypjen do di si të veproj, qoftë edhe me drejtuesit e RTSH. Ata që janë përgjegjës për paraqitjen në Eurosong, qoftë edhe me autorët e këngës, orkestruesit dhe të gjithë ata që merren me dukjen. Mendoj që të gjithë këngëtarët që vijnë (nga Eurovizioni), vijnë me një traumë që quhet trauma post festivali Europian. Është shumë mistike, shumë misterioze”, tha Eneda.
