Një 28-vjeçar shqiptar që quhet Xhanin feka vuan nga probleme të talasemisë dhe ka probleme me zhvillimin e trupit. Në dukje, çdo njeri që e sheh mund të mendojë se është 13 vjeç.
Top Channel sjell historinë e të riut i cili vuan nga mungesa e gjakut dhe gjendja e vështirë ekonomike, që bën të mos i mbulojë dot shpenzimet e sëmundjes.
Çdo 21 ditë Xhanin duhet të marrë gjak për të vijuar jetën normalisht. Ai ishte vetëm 3 vjeç kur prindërit e kuptuan që kishte sëmundjen e talasemisë:
“Kam 25 vite që vuaj nga kjo sëmundje, gjithë problemi jonë është mungesa e gjakut gjë e cila ka ndikuar negativisht tek ne. Prandaj duhet një apel për të gjithë njerëzit në Shqipëri që të dhurojnë sa më shumë gjak”, thotë i riu.
I pyetur nga gazetarja sesi reagojnë njerëzit për moshën e Xhaninit, ai shprehet:
“Kur i them që jam 28 vjeç ndonjëherë e besojnë, e ndonjëherë nuk e besojnë, por tani me kartat e identitetit behët e besueshme kjo gjë”, shprehet Feka.
28-vjeçari ka përfunduar ciklin e studimeve të larta për agro-biznes, por që ende nuk është diplomuar për këtë arsye ai prej 6 vjetësh punon si operator kompjuterik. Ai na bën të ditur që të ardhmen nuk e shikon në Shqipëri, por në një vend ku trajtimi mjekësorë dhe ai social është më i mirë.
“Planet e mia në vazhdimësi janë në vendet e BE-së, sepse vetë sëmundja jonë jashtë shtetit ka më shumë përkujdesje”, thotë 28-vjeçari.
/Top Channel
