Prokuroria e Tiranës ka zbuluar se Ervis Martinaj, i përfshirë në ngjarjen e ndodhur në ish-Bllok një muaj më parë disponon dhe një pasaportë tjetër me emër tjetër të Republikës së Kosovës.
Për këtë arsye sipas Prokurorisë ekziston rreziku që ai të arratiset jashtë vendit nëse Gjykata nuk vendos për të masën e arrestit me burg. Sipas hetimeve të prokurorisë Martinaj më herët ka lëvizur jashtë vendit më këtë pasaportë dhe ka dyshime se ai e ka falsifkuar vetë këtë mjet identifikimi.
“Nga veprimet e kryera deri në këtë moment procedural, ka dyshime të bazuara në akte se shtetasi Ervis Martinaj është i pajisur me një tjetër pasaportë si shtatas kosovar me emrin Admir Koca. Pas komunikimit me njësitë e bashkëpunimit ndërkombëtar dhe koordinimit për verifikim, ka rezultuar se shtetasi Ervis Martinaj disponon një tjetër pasaportë me identitetin Admir Koca, të cilën e ka përdorur edhe për të dalë jashtë kufijve të Shqipërisë, dokumentuar me printim nga sistemi TIMS. Dokumentohet në këtë mënyrë qartazi rreziku i ikjes së shtetasit Ervis Martinaj” – thuhet në dokumentacionin e Prokurorisë.
Ndërkohë Prokuroria e Tiranës thotë se ka dërguar në Kosovë një letërporosi, pasi dyshohet se Martinaj ka kryer edhe veprën penale të falsifikimit të dokumentave.
