Situata e Koronavirusit në vend ka detyruar qeverinë të shtyjë detyrimet e bizneseve deri në muajin qershor.
Këtë e ka bërë të ditur Kryebashkiaku i Tiranës, Erion Veliaj, i cili në një lidhje direkte me emisionin “Dita Jonë” është shprehur:
“Një nga vendimet e para që do të marrë Këshilli Bashkiak në mbledhjen virtuale do të jetë shtyrja e afatit për të gjitha detyrimet nga bizneset deri në qershor. Unë jam kundër atyre politikanëve populistë që vendimet merren çdo ditë. Ne nuk mund të marrim vendime ditore. Ne kemi pasur vetëm një ditë humbje pune, që ishte e premtja. Më pas do të konsultohemi me qeverinë, sa të zgjasë kriza, në të njëjtën masë do të jetë ndihma.”
Ndërsa, përsa i përket mbylljes së parkut të Liqenit Artificial, Veliaj tha:
“Në dallim nga një dyqan, nuk ka një qepen, është një hapësirë gjigante dhe kërkohet një sensibilizim i posaçëm. Vumë re se shumë të moshuar vijuan të luajnë domino aty. Arritëm në konkluzionin që të merrnim këtë masë radikale. Parku po kthehej në një magnet për qytetarët, sidomos për të moshuarit. Për të qenë bashkë nesër, duhet të jemi të ndarë sot.
Kjo është një situatë e jashtëzakonshme. Fakti që kemi mbërritur në këtë ditë është se duhet të marrim masa të jashtëzakonshme. Një nga arsye që disa nga fqinjët tanë kanë shumë të prekur është se e morën më lehtë. Në 97-ën i dëgjonim plumbat, tani është e pamundur të dëgjojmë plumbat virtualë”- u shpreh Veliaj.
Deri tani, bilanci i Koronavirusit në vendin tonë rezulton në 55 të prekur dhe 1 viktimë, ndërsa në godinën e infektivit po qëndrojnë të shtruar 20 pacientë.
