Eneda Tarifa ka reaguar ashpër pas shpalljes së fitueses së Festivalit të RTSH-së. Kjo pasi kur Eneda fitoi vjet festivalin e 54-t në RTSH me këngën “Përrallë”, Lindita Halimi postoi një status ku shprehej kundër këngëve “depresive, dramatike dhe me britma”, që dukej se i drejtohej pikërisht Enedës.
Kështu dje, Eneda Tarifa i ktheu përgjigje të drejtpërdrejtë Lindës, me një status ku përsërit të njëjtat fjalë që Lindita kishte shkruar vjet.
“Mos erdhi gjë koha të të kthej statusin e vjetshëm e dashur Linda ? Bota – “portokall”.”, shkruan ajo, ndërsa sqaron se statusi nuk i drejtohet kompozitorit Klodian Qafoku apo tekstshkruesit Gerald Xhari (Big Basta). “Këtu përjashtoj vetëm Klodjan Qafokun dhe Geri Xharin. Ky status nuk ka lidhje me ta”.
Pranë fotos së Lindës, Eneda rikujton fjalët që këngëtarja tha si sot e një vit më parë: “Njerëzit janë lodhur nga këngët vajtuese, dramatike, britma!! Jetojmë në një kohë ku duam ritëm, meqë na kanë mbytur hallet e jetes, dhe duam relaks, kënaqësi, të harrojmë hallet! Mjaft më me kengë depresive!!! U bëmë bajat jo për gjë… !!! Sikur na ka ngec disku në replay! Mirë kaq kisha. Shëndet për të gjithë”.
