Busra Develi dhe Burak Deniz ishin ndër çiftet më të dashura për publikun, të cilët adhuroheshin jo vetëm për karrierën në kinematografinë turke, por edhe për historinë e tyre të dashurisë. Mirëpo mediat turke, dhanë lajmin pak ditë më parë se pas tre vitesh, ata kishin vendosur të ndaheshin. Lajmi u hodh poshtë menjëherë nga aktori Burak Deniz, i cili i kërkoi mediave që të merren me gjëra më të rëndësishme sesa jeta e tij private.
“Miqtë e mi, njerëzit flasin sikur e dinë të vërtetën. Ju lutem, merruni me çështje më të rëndësishme” – shkruan Burak Deniz në profilin e tij në “Twitter”.
Sakaq, në profilin e saj në “Instagram”, mëngjesin e sotëm aktorja turke Busra Develi konfirmoi se ata janë ndarë.
“Dashuria 3-vjeçare mes meje dhe Burak, erdhi drejt fundit. Ne kemi ende respekt dhe dashuri për njëri-tjetrin. Për të gjitha institucionet që do të ndërmarin iniciativën të shkruajnë lajme pa u konfirmuar nga unë, ju bëj me dije se do t’i drejtohem institucioneve ligjore”- shkruan aktorja turke Busra Develi.
Pak muaj më parë, Busra dhe Burak publikuan filmin e tyre të parë së bashku “Arada”. Mirëpo sipas mediave turke, vëmëndja që i është kushtuar aktorit turk, ka irritur partneren e tij, duke shkaktuar debate mes tyre.
