Ka qenë vetëm 17 vjeçe kur fitoi kurorën e më të bukurës.
Shumë prej miss-eve shqiptare që kanë rrëmbyer këtë titull, nuk i kemi parë më pas spektaklit, që ju hap derën drejt famës dhe suksesit. Por pasioni për të bukurën, bëri që Agnesa Vuthaj ta kthente emrin e saj në markën më të njohur të çantave, në trojet shqiptare dhe jo vetëm. Tashmë si një “business woman”, Agnesa ka bërë prezantimin e parë të linjës së çantave, të dizenjuara vetë, në New York, ku ka marrë mbështetjen edhe të personaliteteve të njohura në fushën e modës dhe Hollivudit.
Ish-miss-i rrëfen për “Iconstyle.al” se do të kishte sukses në çdo fushë, pasi gjithmonë e shoqëron pasioni dhe vullneti për punë. Ajo flet për ëndrrën, që përjetoi kur sfiloi personalisht në Javën e Modës në New York, duke qenë njëkohësisht, CEO i markës, dizajnuese, modele dhe një nga fanset më të mëdha të krijimeve të saj.
Agensa tregon ekskluzivisht për “Iconstyle. al”, edhe për takimin me aktoren Jennifer Garner dhe përshtypjet e saj për koleksionin. Për t’u frymëzuar nga një histori suksesi dhe për disa këshilla që duhet të dini, para se të blini çantën për sezonin e dimrit, ne ju ftojmë të lexoni intervistën me Agnesa Vuthajn:
-Si ndihesh kur je një nga të paktat vajza shqiptare që shijove nga afër Javën e Modës?
Në fakt do të doja shumë që edhe shumë vajza e djem të tjerë, të kishin rastin të shijojnë atë eksperiencë aq mbresëlënëse. Besoj që jemi një popull shumë i talentuar, i mençur dhe i bukur dhe meritojmë të jemi të pranishëm, në çdo event të rëndësishëm ndërkombëtar, e aq më tepër në New York, në vendin ku ëndrrat bëhen realitet. Unë përjetova për herë të parë shkëlqimin e Javës së Modës në New York, ndonëse kjo ëndërr nuk më është realizuar si modele, m’u realizua këtë vit si dizajnuese. Për mua ishte një ndjenjë magjike dhe ndoshta edhe surreale mund të thosha. Si dizajnuese e re, prezantimin e koleksionit tim në ngjarjen më të rëndësishme të modës, padyshim e konsideroj si një arritje të jashtëzakonshme dhe në njëjtën kohë edhe si frymëzim dhe motivim për të punuar akoma më shumë dhe për të besuar, që gjithçka është e mundur.
Çfarë risie solle me koleksionin e çantave që prezantuat në NY?
Koleksioni i prezantuar në NYFW ishte një vazhdimësi e krijimeve të mia, çanta të punuara nga artizanë të njohur italianë me traditë dekadash, me lëkurë të vërtetë, me ngjyra dhe forma të ndryshme. Në një kohë, ku të gjitha markat e njohura po sjellin modele shume të ngjashme, koleksioni im është vlerësuar jashtëzakonisht shumë, sepse është sa klasik aq edhe ndryshe, çanta të cilat mund t’i përdoresh në përditshmëri, gjatë udhëtimeve apo fundjavave, deri tek ato me elegantet me lëkura ekzotike, me të cilat do të shkëlqesh në çdo mbrëmje, por po ashtu kam edhe një linjë me çanta të pikturuara nga artiste të talentuara, të cilat janë vlerësuar shumë dhe përdoren shumë edhe për editoriale mode.
Çfarë këshilla ke për vajzat që duan të blejnë një çantë për sezonin e vjeshtës?
Do t’ju këshilloja një çantë ditore më të madhe, që ka hapësirë të mjaftueshme për gjërat personale të përditshme, e pse jo edhe për një shall apo bluzë më shumë, ose edhe ndonjë çadre, meqë është sezoni më i ftohtë dhe me shi. Për mua mbi të gjitha ka rëndësi rehatia, prandaj çantat e mia kanë një hapësirë të madhe dhe të organizuar mirë dhe patjetër sugjeroj çanta lëkure, sepse një lëkurë e bukur e plotëson çdo stil veshje dhe është jetëgjatë. Unë besoj që çdo femër ka një lidhje shumë të veçante me çantën, sepse aty mbajmë gjërat më me vlerë dhe është një produkt, që nuk e ndërrojmë çdo ditë sikur veshjet. Prandaj duhet të jetë i qëndrueshëm edhe ndaj motit apo aktiviteteve të përditshme dhe padyshim një produkt shumë i këndshëm në prekje, që të japë një ndjenjë të bukur sa herë e fut dorën në të, sa herë që e sheh krahas teje, ulur pranë teje, apo duke nxituar bashkë me ty në një ditë të ngarkuar.
Do sugjeroja ngjyra të ngrohta dhe të ëmbla që i japin kuptim stinës më romantike. Gështenjë, vjollcë e errët, e kuqe apo e gjelbër ushtarake janë ngjyrat, që do i shtonin jetë përditshmërisë suaj dhe stil kombinimeve tuaja vjeshtore.
-Si është të jesh edhe modele dhe CEO i markës që zotëron?
Unë për momentin përveç CEO-s dhe modeles, bëj edhe dizajnuesen, marketingun dhe shumë gjëra të tjera që kërkon kompania në këtë fazë. Është rast i mirë që kam fatin të bëj edhe modelen e produkteve të mia sepse kam një lidhje të veçante me produktet, që krijoj dhe kjo reflektohet edhe tek klientet dhe arrin rezultatin e pritur. Unë bashkëpunoj edhe me modele të tjera herë pas here dhe më pëlqen akoma më shumë kur shoh produktet e mia tek modelet e tjera e aq më tepër edhe tek klientet e kënaqura.
-Sa për qind të punës e bën për fitim dhe sa për kënaqësi dhe pasion?
Këto të dyja janë të ndërlidhura me njëra-tjetrën. Sigurisht e gjithë puna ime është pasion dhe e bëj me shumë dashuri, por edhe fitimi është pjesë e punës, gjë që më ndihmon që ta zhvilloj dhe ta zgjeroj akoma më shumë brendin.
-Në cilin qytet apo shtet siguron fitimin më të madh sa i përket shitjes së çantave?
Për momentin pika kryesore është në New York dhe po punoj fort që të arrij të zgjerohem edhe në vende te tjera.
-Si ishte të takoje nga afër aktoren Jennifer Garner dhe për çfarë biseduat?
Sapo e takon, menjëherë e kupton pse është ajo që është. Kishte një prezencë të jashtëzakonshme, shume e afërt dhe e dashur. Biseduam për mënyrat e mundshme për të kontribuar më shumë, për fëmijët në nevojë, për të siguruar një të ardhme më të mirë për ta, duke rikujtuar thënien e saj “mos shpreso vetëm, por jep shpresë”. Gjithashtu biseduam edhe për Javën e Modës në New York dhe suksesin që kisha me prezantimin e parë të linjës sime të çantave. Jennifer adhuronte çantat e mia dhe ky fakt me lumturoi pafund.
-A mendon se do të kishe sukses në biznes nëse nuk do të fitoje titullin e Miss-it?
Unë besoj se do të kisha sukses në çfarëdo që do bëja në jetë, sepse punoj shumë dhe me një pasion të madh dhe besoj që puna jep rezultat, ndonjëherë më shpejt, ndonjëherë më vonë, çdo punë ka ciklin e vet të arritjes së rezultateve. Miss-in e kam fituar në moshën 17-vjeçare dhe gjithçka ka ardhur pasi ka qenë rezultat i përkushtimit dhe punës së vazhdueshme. Ndër vite kam punuar në projekte të ndryshme, në kërkim të vetvetes dhe të asaj që më pëlqen të bëj më shumë në jetë dhe jam me fat, që ka qenë një rrugëtim i bukur, me plot sfida, të cilat më kanë rritur dhe më kanë bërë kjo që jam sot.
-A ke konkurrentë të fortë brenda trevave shqiptare?
Besoj që çdokush ka veçantinë e vet, punën e vet dhe ambiciet e veta. Është e rëndësishme të jemi ndryshe nga njëri-tjetri dhe të ofrojmë në treg produkte të bukura dhe cilësore dhe pastaj klientët kanë mundësi të zgjedhin produktet, që pëlqejnë më shumë. Unë jam në konkurrencë vetëm me vetveten dhe përkushtohem shumë që të jem çdo ditë më e mirë në çdo gjë që bëj.
Burimi: Iconstyle.al
