Emily Ratajkowski ka akuzuar fotografin Jonathan Leder se e ka ngacmuar seksualisht dhe e ka përdhunuar gjatë realizimit të një seti fotografik në shtëpinë e tij në vitin 2012.
Në një shkrim të gjatë për NY Magazine të botuar të martën, modelja dhe aktorja 29-vjeçare shkruan se kishte udhëtuar në shtëpinë e Leder për në një sesion fotografik falas për një revistë të quajtur Darius, ku i duhej të qëndronte për një natë.
Asokohe një modele e panjohur 20-vjeçare, Ratajkowski me të arritur në shtëpinë e Leder, ishte befasuar kur zbuloi se do të pozonte e veshur vetëm me të brendshme. Në përpjekje për tu dukur e pjekur, ajo pranoi edhe verën e kuqe që ai i ofroi gjatë mbrëmjes.
Pasi u fotografua me të brendshme, Ratajkowski pretendon se Leder i kërkoi të zhvishet: “Le ta provojmë lakuriq tani”.
“Në sekondën që unë hoqa rrobat, një pjesë e imja u veçua. Fillova të dal jashtë vetes. Blici i tij ishte aq i ndritshëm dhe unë kisha pirë aq shumë verë, saqë pika të zeza gjigante po zgjeroheshin dhe dilnin para syve të mi”.
Më vonë, kur artistja e grimit që ishte e pranishme për xhirimin shkoi për të fjetur, Ratajkowski, e cila thotë se ishte “shumë, shumë e dehur”, u mbështoll nën një batanije në divan bashkë me fotografin, i cili nisi ta pyeste për të dashurit e saj ndërsa shikonte teksa modelja fërkonte këmbët e saj për t’i ngrohur.
“Ai më tha se i pëlqente ajo gjëja që po bëja me këmbët. Shumica e asaj që erdhi më pas ishte një turbullirë përveç ndjenjës. Nuk mbaj mend të jemi puthur, por mbaj mend që gishtat e tij papritmas ishin brenda meje”, pohon ajo.
“Gjithnjë e më fort dhe shtynte dhe shtynte sikur askush nuk më kishte prekur më parë ose nuk më ka prekur që atëherë. Kjo me të vërtetë më dhembi. Unë e çova dorën time në mënyrë instiktive tek kyçi i tij dhe nxora gishtat e tij nga unë me forcë. Nuk thashë asnjë fjalë. Ai u ngrit papritmas dhe u turr i heshtur në errësirën e shkallëve”.
I kontaktuar nga The Cut, Leder mohoi pretendimet e Ratajkowski-t, duke i thënë gazetarit se pyetjet ishin shumë fëmijënore për t’u përgjigjur.
Duke iu referuar xhirimeve lakuriq dhe topless që Ratajkowski ka bërë në vitet kur ka punuar me të, Leder vazhdoi: “A e dini për kë po flasim apo jo? Kjo është ajo vajza që kërceu lakuriq në videon e Robin Thicke në atë kohë. Ju vërtet dëshironi që dikush të besojë se ajo ishte një viktimë”?
Por kjo nuk është përplasja e parë mes fotografit dhe modeles, pasi në vitin 2016, Leder publikoi një libër me foto nudo të Ratajkowski-t pa pëlqimin e saj, të cilin modelja dhe aktorja e akuzoi si një “shkelje”.
