Një familje e thjeshtë në veri të Shqipërisë ka tërhequr vëmendjen e gazetës prestigjoze britanike “The Sun”.
Në fakt, jo për tu çuditur pasi shqipëtarët të cilët jetojnë dhe punojnë në Britaninë e Madhe me ose pa dokumente janë të shumtë.
“The Sun” ka ndërmarrë rrugën e gjatë deri në veri të vendit, ku ka takuar një familje, e cila tre fëmijët i ka në emigracion, njëri prej të cilëve në Angli.
Seit Shabaj dhe bashkëshortja e tij Xheride treguan se me paratë e dërguar nga fëmijët “kanë ndërtuar shtëpinë e ëndrrave në vendin e tyre”, gjë të cilën nuk do ta bënin dot me një punë në Shqipëri.
Një nga djemtë e çiftit Shabaj, Nimeti arriti në “tokën e premtuar” duke sakrifikuar jetën në një udhëtim në pjesën e pasme të një kamioni dhe tani jeton në Londër.
Shtëpinë e çiftit të moshuar në veri të Shqipërisë, gazeta britanike në reportazhin e tyre e përshkroi si një rezidencë madhështore, me një pamje mahnitëse mbi një luginë lumi, e cila padyshim është më “lluksozja” në fshat.
Dhe Saiti, 70, dhe 53-vjeçarja Xheride shpresonin se djemtë e tyre – të cilët punojnë jashtë vendit – do të ktheheshin në atdhe sapo të ndërtohej shtëpia.
Mirëpo duket se vilën në fshat do ta gëzojnë çifti i të moshuarve, pasi djemtë e tyre ia kanë bërë të qartë se nuk kanë ndërmend të kthehen nga rruga e emigracionit.
Zona të mëdha të Shqipërisë po braktisen nga të rinjtë që shkojnë jashtë vendit për paga më të larta, me Britaninë e Madhe e cila kryeson deri më tani si destinacioni më popullor.
Shifrat e fundit tregojnë se shqiptarët janë grupi më i madh i emigrantëve të paligjshëm që kalojnë kanalin e rrezikshëm me varka të vogla.
Këtë vit rreth 12,000 persona, krahasuar me 50 në 2020, kanë paguar deri në 20,000 £ për të kaluar në mënyrë të paligjshme në Angli.
Shumë prej tyre vijnë nga fshatra të vegjël në zonat e varfra, rurale në veri të vendit si Rrasek.
Por me kaq shumë të rinj që largohen, kjo do të thotë se qindra fshatra po vdesin.
Rrasek dikur kishte një popullsi prej 500 banorësh, por tani ka rënë në rreth 100.
Elektricisti në pension Sait u shpreh:
“Është një problem i madh sepse tani këtu ka vetëm të moshuar.
“Të gjithë të rinjtë kanë shkuar për punë, kështu që të gjitha të rejat kanë shkuar gjithashtu.
“Kjo do të thotë që unë nuk mund të gjej një ndërtues për të përfunduar murin tim të përparmë.”
Teksa qëronte portokallet e mbledhura nga pemishtja e tij, ai pranoi se kishte vetëm një mënyrë për të mbledhur 100,000 £ që duheshin për të ndërtuar pronën e tij madhështore.
I moshuari shtoi:
“Anglia është vendi më i mirë në këtë tokë. Është kampion i destinacioneve.
“Gjithmonë është konsideruar si vendi më i mirë për të shkuar. Në çdo vend tjetër në Evropë, pagat janë më të ulëta se në Angli.
“Në Shqipëri mund të fitosh 30 £ në ditë. Në Angli është 150 £ në ditë.
“Kur njerëzit shkojnë në Angli, ata gjejnë një punë dhe më pas i ndihmojnë njerëzit këtu për të ndërtuar shtëpi siç kemi bërë ne.
“Emigrantët si fillim ndërmarrin një udhëtim deri në Belgjikë ose Francë, qëndrojnë atje për disa javë dhe më pas paguajnë nga 5,000 deri në 20,000 £ për të hipur në një kamion për të shkuar në Angli përmes Eurotunelit.
“Kjo mund të tingëllojë si shumë para, por ia vlen sepse Shqipëria është e falimentuar.
“Gjithçka është shkatërruar në këtë vend, kështu që të rinjtë i marrin paratë hua dhe e dinë se për katër apo pesë vjet do t’i kenë paguar ato.”
Djali i Saitit, Nimeti ndoqi atë rrugë të paligjshme shtatë vjet më parë. Më vonë ai u martua me një grua në Angli, duke i dhënë të drejtën për të jetuar në Mbretërinë e Bashkuar.
Ai punon në ndërtim dhe vazhdon të dërgojë para në shtëpi, ashtu si vëllezërit e tij më të mëdhenj që punojnë si ndërtues në Greqi dhe Itali.
Edhe bariu i dhive në fshatin verior të Shqipërisë, Jetmir Hyseni, 50 vjeç, një nga të paktët që kanë mbetur në fshat, u shpreh për “The Sun”: “
Nëse dikush më ofronte mundësinë, do të shkoja sot. Mund të fitoja 50 £ në ditë ose më shumë duke punuar në Angli. Këtu fitoj 2 £ në ditë.”
Sait Shabaj pranoi se rritja e qyteteve fantazmë të Shqipërisë është një shqetësim, por shtoi se:
“Ne e dimë se në Angli nuk janë të kënaqur me shumë emigrantë nga Shqipëria.
“Por ne kemi dëgjuar se Anglia ka nevojë për punëtorë dhe shqiptarët janë punëtorë shumë të mirë.
“Përpara se të kishim këtë shtëpi, jetonim në një ndërtesë guri me një dhomë gjumi.
“Nëse do të kisha pasur mundësinë kur isha më i ri të shkoja në Angli, do të kisha shkuar”.
