Udhëtimet jashtë vendit nuk mund të bëhen pa telefon, i cili është kthyer në mjetin kryesor të komunikimit, e rrjedhimisht edhe paketta Roaming.
Nga krahasimi që bëmë me vendet fqinje, Greqi dhe Itali, të 3 kompanive celulare në vendin tonë vumë re pak kohë më parë se paketat kishin çmime shumë herë më të larta dhe ofronin shumë pak.Të gjitha këto krahasime, ju mund t’i lexoni duke klikuar në linkun KËTU.
Sikur të mos mjaftonte fakti se qytetarët shqiptarë tarifohen shumë për pak, ky shërbim le shumë për të dëshiruar. Ishin të pafundme pakënaqësitë e qytetarëve në sondazhin e “iconstyle.al” të organizuar disa muaj më parë, ku shpreheshin se pothuajse gjithmonë kanë hasur në probleme me Roaming. (KLIKO)
Roaming me Kosovën?
Ndërkohë, një shqetësim shumë i madh i shprehur në masë nga qytetarët është fakti se ende duhet të aktivizojnë paketat Roaming kur udhëtojnë nga Shqipëria drejt Kosovës dhe anasjelltas. Ndonëse sipas dokumetave zyrtare rruga drejt heqjes së ‘Roaming’ mes Shqipërisë dhe Kosovës ka nisur prej dy vitesh, në realitet po ndodh e kundërta.
Autoriteti i Komunikimeve Elektronike dhe Postare (AKEP) nxori për konsultim dokumentin publik për rregullimin e Tarifave të Shërbimeve Roaming Ndërkombëtar Shqipëri-Kosovë në 2019. Nga 1 korriku i atij viti, premtohej se shtetasit shqiptarë do të flisnin në celular me tarifa më të lira ‘Roamingu’, dhe duke filluar nga korriku i vitit 2020 ose 2021 tarifat do hiqen plotësisht.
Dokumenti është hartuar pasi më datë 26.11.2018 në mbledhjen e përbashkët të Qeverive të Republikës së Shqipërisë dhe Republikës së Kosovës, ministritë përgjegjëse për fushën e komunikimeve elektronike të dy vendeve nënshkruan “Marrëveshje për heqjen e cmimeve të shërbimeve roaming për rrjetet publike të komunikimeve të lëvizshme ndërmjet Republikës së Kosovës dhe Republikës së Shqipërisë”. Ministritë përgjegjëse ranë dakord që zbatimi i regjimit të ri të fillojë gradualisht nga 15 qershor 2019, sipas një plani dhe afateve të rëna dakord ndërmjet rregullatorëve.
Në lidhje me bazën ligjore të rregullimit të tarifave Roaming marrëveshja parashikon që brenda datës 30 mars 2019 të dy vendet të kenë marra masa për miratim të cdo ndryshimi ligjor për komunikimet elektronike që të mundësojë zbatimin e marrveshjes nga rregullatorët e dy vendeve (AKEP për Shqipërinë dhe ARKEP për Kosovën).
Telekom ndryshoi emrin, jo shërbimin!
Telekom Albania, operatori i dytë më i madh i telefonisë celulare në vend, ka ndryshuar emrin e tij tregtar në verë. Sipas depozitimit të bërë në Qendrën Kombëtare të Biznesit, në datën 27 korrik, emri i subjektit nga “Telekom Albania” bëhet “One Communication”, ndërsa emri tregtar nga “Telekom Albania” bëhet “ONE”. Ndryshimi i emrit erdhi më shumë se një vit pasi kompania u ble nga shqiptaro-bullgarët e “Albania Telecom Invest AD”. Deri tani, kompania kishte përdorur markën tregtare “T”, të aksionerit të mëparshëm “Deutsche Telecom”.
Megjithatë, ky ndryshim nuk është përkthyer në ndryshime të tjera në paketa, apo veprime të tjera. Kështu, ka ndodhur edhe me paketat Roaming me Kosovën. Nëse u hedhim një sy paketave ‘roaming’ të One vihet re mjaft mirë se sa shumë abuzohet me çmimet.
Lidhur me paketat e Internetit, sikundër mund ta shihni më poshtë, lidhur me njësit që ofrojnë janë shumë të kushtueshme.
Kështu 150 MB kushtojnë 250 lekë të vlefshme për një ditë. Vetëm 700 MB kushtojnë 800 lekë të vlefshme për një javë, ndërsa një paketë tjetër të ofron 1.5 GB për 14 ditë dhe kushton 1500 lekë.
Nuk ofrojnë më shumë paketat e tjera që përmbajnë edhe minuta dhe SMS. Paketa “MIX” njëditore përmban 50 MB, 20 minuta drejt One, 5 minuta drejt të gjithëve, 10 minuta hyrëse dhe 10 SMS drejt të gjithëve për 400 lekë.
Ndërkohë një tjetër paketë “MIX” 4 ditore që kushton 800 lekë ofron 100 MB, 50 minuta drejt ONE, 10 minuta drejt të gjithëve, 50 minuta hyrëse dhe 50 SMS drejt të gjithëve.
Vetëm 200 MB të ofrohen për 10 ditë, 100 drejt One, 10 minuta drejt të gjithëve, 50 minuta hyrëse, 100 SMS drejt të gjithëve për 1 mijë lekë.
Nëse ju nuk aktivizoni asnjë nga paketat e mësipërme, atëherë tarifat për çdo njësi do ju kushtojë shumë më shumë, sikundër mund ta shihni në tabelën e mëposhtme.
E njëjta gjë ndodh pak a shumë edhe me dy kompanitë e tjera telefonike, Vodafone dhe ALB Telecom.
Të ardhurat, operatorët shqiptarë fitojnë neto qindra mijëra euro
Të ardhurat me shumicë nga roamingu të tre operatorëve celularë nga ‘Roamingu’ me Kosovën (të ardhurat që operatorët Shqiptarë marrin nga operatorët e Kosovës kur pajtimtarët e tyre vizitojnë Shqipërinë) në vitin 2016 ishin rreth 189 mijë euro, ndërsa në vitin 2017 ishin 255 mijë euro. Të ardhurat nga përdorimi i data (interneti) zënë rreth 62% të totalit të këtyre të ardhurave me shumicë.
Kostot me shumicë (pagesat që operatorët Shqiptarë u kryejnë operatorëve të Kosovës kur përdoruesit celularë Shqiptarë vizitojnë Kosovën) ishin rreth 148 mijë euro në vitin 2016, dhe 158 mijë euro në vitin 2017.
Të ardhurat neto të operatorëvë Shqiptarë (diferenca të ardhura me shumicë minus kosto me shumicë) ishin rreth 41 mijë euro në vitin 2016 dhe 97 mijë euro në vitin 2017. Pra bilanci neto i të ardhurave dhe kostove me shumicë është pozitiv për operatorët Shqiptarë. Në vitin 2018 të ardhurat neto me shumicë të tre operatorëve shqiptarë nga ‘Roamingu’ me Kosovën ishin rreth 150 mijë euro, apo rreth 50% me shumë se në 2017.
AKEP rri duarkryq
Vetë AKEP-i nuk ka ndërmarrë asnjë masë për adresimin e problemeve të hasura dhe për moszbatimin e vendimeve të saj.
Duke marrë shkasë nga shqetësimet e shumta të ngritura, duhet thënë se kjo çështje prek edhe turizmin, pasi shqiptarët e Kosovës që vizitojnë Shqipërinë janë të shumtë dhe janë të detyruar të aktivizojnë paketat “Roaming”.
Edhe në këtë drejtim mund të themi se Autoriteti i Komunikimeve Elektronike dhe Postare (AKEP), nuk e ka përmbushur me efektivitet mbikëqyrjen e tregut të telefonisë celulare pasi nuk janë arritur rezultatet e pritshme, dhe ende nuk është ndërmarrë asnjë veprim.
