Njeriu më i pasur në botë, Elon Musk pyeti 62.5 milionë ndjekësit e tij në Twitter nëse ai duhet të shesë 10% të aksioneve të tij në Tesla.
“Shumë është folur kohët e fundit për fitimet e parealizuara që janë një mjet për shmangien e taksave, kështu që unë propozoj të shes 10% të aksioneve të Tesla-s,” shkroi Musk në një postim në Twitter duke iu referuar një “takse miliarderësh” të propozuar nga demokratët në Senatin amerikan.
Musk shkroi në Twitter se do t’i përmbahej rezultateve të sondazhit. Ai mori më shumë se 700,000 përgjigje brenda një ore pasi e postoi, me gati 56% të të anketuarve që miratuan propozimin për shitjen e aksioneve.
Much is made lately of unrealized gains being a means of tax avoidance, so I propose selling 10% of my Tesla stock.
Do you support this?
— Elon Musk (@elonmusk) November 6, 2021
Shitja e 10% të aksioneve të tij do të arrinte afërsisht 21 miliardë dollarë, sipas llogaritjeve të Reuters. Komentet nga Musk vijnë pas propozimit në Kongres për të taksuar pasuritë e miliarderëve për të ndihmuar për axhendën sociale dhe të ndryshimeve klimatike të Joe Biden.
“Vini re, unë nuk marr rrogë në para ose bonus nga askund. Unë kam vetëm aksione, kështu që e vetmja mënyrë që unë të paguaj taksat personalisht është të shes aksione.”, tha Musk.
Kujtojme se drejtori i Programit të Ushqimit në OKB David Beasley tha se vetëm 2% e pasurisë së Elon Musk mund të zgjidhë çështjen e urisë në botë.
Lidhur me këtë deklaratë regoi dhe Elon Musk. Në një postim të fundit në Twitter, Musk ka shprehur se është i gatshëm që të dhurojë një pjesë të pasurisë së tij për t’i dhënë fund krizës së urisë në botë, mjafton që Organizata e Kombeve të Bashkuara t’i vërtetojë se si 6 miliardë dollarë do t’i japin fund krizës.
“Nëse Programi Botëror i Ushqimit mund të përshkruajë saktësisht se si 6 miliardë dollarë do të zgjidhin krizën e urisë, unë do të shes aksionet e Tesla-s tani dhe do ta bëj.”
