Themeluesi dhe CEO i SpaceX, Elon Musk, njoftoi se satelitët e internetit Starlink të kompanisë janë tani aktivë në Ukrainë pasi vendi vuan nga ndërprerjet e energjisë elektrike për shkak të pushtimit të Rusisë.
“Shërbimi Starlink tani është aktiv në Ukrainë,” shkroi Musk, CEO i Tesla, në Twitter. “Më shumë terminale gjatë rrugës.”
Zëvendëskryeministri i Ukrainës i kërkoi Musk që të ofrojë shërbimin e internetit për vendin në mes të sulmeve ruse dhe Musk e bëri të mundur këtë gjë, sipas një shkëmbimi komunikimesh në Twitter mes të dyve të shtunën.
Mykhailo Fedorov, i cili është gjithashtu ministër i transformimit dixhital i Ukrainës, i shkroi Musk:
“Ndërsa ju përpiqeni të kolonizoni Marsin — Rusia përpiqet të pushtojë Ukrainën! Ndërsa raketat tuaja zbarkojnë me sukses nga hapësira — raketat ruse sulmojnë njerëzit civilë ukrainas! Ne ju kërkojmë të pajisni Ukrainën me stacione Starlink […]”
Starlink është një plejadë interneti e bazuar në satelitë që synon të mbulojë planetin me shpejtësi të lartë dhe mund të sjellë potencialisht lidhje për miliarda njerëz të cilëve ende u mungon aksesi në internet.
Ka pasur ndërprerje të përhershme të energjisë në Ukrainë, por interneti është ende “përgjithësisht i disponueshëm”, u tha gazetarëve të shtunën një zyrtar i lartë i mbrojtjes amerikane.
