Ekspertiza e Mjekësisë Ligjore për Klodian Rashën është pjesë e zinxhirit të shtrembërimit të së vërtetës mbi vrasjen. Presioni nga lart ka sjellë interpretime që “provojnë” njoftimet paraprake dhe dëshmitë e “rregulluara” nga efektivët e policisë deri tek ministri i Brendshëm, Sandër Lleshaj.
Drejtorin e Institutit të Mjekësisë Ligjore, Bledar Xhemali nuk do ta njihte njeri deri më sot, nëse nuk do të plaste skandali i mashtrimit me numrin e të vdekurve nga Covid-19. Fotot zbuluan realitetin e dhimbshëm, ku të vdekurit ishin aq të shumtë sa vendoseshin në dysheme.
Aty u kuptua forca e manipulimit të pushtetit, që arrin deri tek morgu. Këta mjekë që vulosnin statistikat e qeverisë për Covid, nuk e kanë për gjë të zhgarravisin një ekspertizë mjeko ligjore në favor të policisë dhe në dëm të viktimës.
Dyshimet mbi ekspertizën paraprake
Për të kuptuar përse konkluzionet e ekspertizës shtrembërojnë të vërtetën duhet t’i vëmë ato në kuadrin e hetimeve që kanë nisur që në vendngjarje.
Prokurori i çështjes Ardian Braho ka paraqitur në gjykatë një ekspertizë paraprake ku “provat” e SHÇBA dhe të mjekut ligjor, rreshtohen me qëllim ndryshimin e dinamikës së ngjarjes në favor të një akuze të butë, po ashtu për të fshehur faktin se viktima është qëlluar në kokë.
Pas këqyrjes së trupit të pajetë të të ndjerit dhe sipas relacionit për masë sigurie që ka bërë prokuroria ndaj policit, arma e policit ka bërë 2 qitje, ndërsa 1 plumb e ka kapur Rashën në pjesën e pasme të shpatullës.
Plumbi i ka prekur zemrën e për pasojë i ka shkaktuar vdekjen, ndërsa predha tjetër nuk e ka prekur fare.
Plumbi në kokë sipas këqyrjes së kufomës nuk ekziston dhe sipas relacionit për masë sigurie, që ka bërë prokuroria ndaj policit, dëmtimi në kokë është shkaktuar në momentin kur viktima ka rënë në tokë.
Më tej, për të provuar se ka pasur një farë përplasje mes policit Nevaldo Haderaj dhe qytetarit Klodian Rasha, në ekspertizën paraprake thuhet se efektivi i forcave “Shqiponja”, është rrëzuar, dhe në këtë moment ai ka shkrepur armën.
Plagët në kokë
Familjarët të cilët e kanë parë Klodianin të vrarë para se të shkonte në spital deklarua se viktima ka shenja në kokë, për të cilat nuk e dinë se nga janë shkaktuar.
Ekzistojnë fotografitë e të ndjerit, ku dallohet plagë në kokë, ku ka edhe 10 të qepura, të cilat media nuik i ka publikuar për arsye etike. I ndjeri ka pasur edhe hematoma në pjesën e ballit dhe hundës për shkak të thyerjes.
Po ashtu, fotot tregojnë një plagë në këtë krah. Nuk dihet plaga që ka goditje në kokë, nga se është shkaktuar. Ndërsa prokuroria thotë se ka vetëm një goditje në shpatull.
Qëllimisht ekspertiza ka përcaktuar vetëm plagën e plumbit në shpatull, ndërsa plagët e tjera nuk i shpjegon. Nëse Klodian Rasha u rrëzua duhet shpjeguar se nga çfarë lartësie ra, në cilin pozicion u godit në kokë, në krah, në hundë, në ballë.
HÇBA në njoftimin zyrtar tha se nga arma e policit është qëlluar 2 herë. Prokuroria dhe ekspertiza balistike duhet të sqarojë se ku shkoi predha tjetër. Ekspertiz balistike dhe ajo e mjekësisë ligjore nuk mund të jenë të shkëputura.
Dëshmitë kontradiktore të policëve
Raporti i SHÇBA-së tregon se efektivi i akuzuar për vrasjen, Nevaldo Hajdaraj dhe kolegu i patrullës, Erion Gjore dhanë dëshmi të kundërta mbi të njëjtin moment, kur u qëllua 25-vjeçari.
Polici i akuzuar Nevaldo Hajderaj, ndaj të cilit gjykata e Tiranës caktoi masën e sigurisë së arrestit me burg me akuzën e “vrasjes në kapërcim të kufijve të nevojshëm të vetëmbrojtjes”, deklaroi se kishte qëlluar ndërsa ishte i rrëzuar në tokë me shënjestër këmbët e viktimës dhe njëherë të dytë në këmbë ndërsa viktima po shkonte drejt një kthese.
Ndërsa kolegu i tij, Erion Gjore ka deklaruar se ka parë një përleshje mes Hajdarajt dhe viktimës dhe se të shtënat i ka dëgjuar gjatë kësaj përplasje fizike.
Sipas Hajdarajt nuk ka patur përleshje me viktimën, por pasi ai është ngritur në këmbë dhe e ka parë viktimën të largohet drejt kthesës ‘ka bërë qitjen e dytë.”
Dëshmitë janë zbardhur në informacionin për referimin e veprës penale në prokurori të përpiluar nga SHÇBA
Hajdaraj pretendon se viktima nxori diçka nga brezi dhe e kërcënoi duke i thënë, ‘mos u afro se do të qëlloj.’ Në këtë moment oficeri ka thërritur ‘armë’ që ta dëgjonte kolegu dhe ka nxjerrë armën e tij të shërbimit nga brezi.
Rasha ka vrapuar drejt rrugicës së Drejtorisë së Doganave i ndjekur nga Hajdaraj, ndërsa kolegu i tij Gjore ka tentuar t’i presë rrugën duke u zhvendosur në krahun tjetër pranë bar ‘Oslo’. Për pak minuta të dy oficerët e policisë e kanë ndjekur Rashën në rrugica në drejtime të ndryshme.
Fillimisht viktima është përballur në një distancë 25 metra me oficerin Gjore dhe ai deklaron se ka dëgjuar “një zhurmë të njëjtë si ajo e mbushjes së armës”, por nuk ka arritur të dallojë armë zjarri për shkak të errësirës.
Sipas Gjores viktima e ka kërcënuar duke i thënë ‘largohu se të vrava’. Oficeri ka nxjerrë armën e shërbimit nga brezi dhe e ka mbushur dhe sipas tij i ka bërë thirrje viktimës të ndalojë.
Gjore deklaron se Rasha nuk i është bindur thirrjes së tij, është kthyer dhe ka vrapuar në drejtim të rrugës Dritan Hoxha. Rasha ka kapërcyer karrexhatën duke u zhvendosur në trotuarin përballë Universitetit Zoja e Këshillit të Mirë dhe ka vrapuar drejt dyqanit Pit Stop – ku është përballur me oficerin Hajderaj.
Këtu nisin kontradiktat në thëniet e tyre. “Përplasja mes tyre ndodhi brenda pak sekondave dhe në një moment kam parë kolegun Nevaldo Hajdaraj të shtrirë në tokë dhe në këtë moment kam dëgjuar dy të shtëna armë zjarri,” ka deklaruar Gjore.
Pasi dëgjoi të shtënat, Gjore thotë se i është afruar Hajdarajt dhe e ka ndihmuar të ngrihet dhe të dy bashkë i janë afruar Rashës që ishte i shtrirë përdhe dhe ‘rënkoi.’ Ai thotë se për shkak të errësirës, oficerët nuk kanë dalluar shenja gjaku dhe kanë dyshuar se viktima ishte rrëzuar dhe kishte pësuar dëmtime në kokë.
Dyshimi i arsyeshëm që lind pas dëshmive kontradiktore të dy policëve është se çfarë fshehin ata. Si është e vërteta e “përleshjes” së Klodian Rashës me policin.
Hematomat në fytyrë dhe plaga në kokë sugjeron se ai mund të jetë rrahur para se të vritej dhe policët e alarmuar se do të denoncoheshin, i kanë qëlluar kur Klodian Rasha ka vrapuar. Nuk asgjë të vërtetë në dëshmitë e dy policëve.
Dyshimet përforcohen edhe nga fakti, se pamjet e kamerave të një lokali pranë vendngjarjes janë deklaruar “të palexueshme” për shkak të teknologjisë së vjetër. Ndërsa, patrulla nuk ishte e pajisur me kamera supi, që duhet t’i mbajnë gjatë shërbimit.
