Programi i Kombeve të Bashkuara (PNUD) në një studim që ka bërë kohët e fundit për florën dhe faunën në Shqipëri ka arritur në përfundimin se rreth 32% e të gjithë florës evropiane gjendet në Shqipëri.
Një rezultat mjaft domethënës dhe që ka lidhje drejtpërdrejt me pozicionin gjeografik që ka Shqipëria me klimë mesdhetare dhe me thyerje të larmishme të terrenit.
Në vendin tonë ekzistojnë rreth 7233 grupe bimore dhe 5438 lloje të kafshëve të egra, duke përfshirë këtu zogjtë, gjitarët, insektet etj.
Nga studimi ka rezultuar se 3200 lloje bimësh janë kurative për enët e gjakut dhe 2350 lloje të tjera, për të tjera përdorime mjekësore dhe për ushqim. Jo vetëm kaq, por edhe 30% e florës evropiane dhe 42% e gjitarëve europianë ndodhen edhe në Shqipëri.
Në vendin tonë ka edhe 32 lloje bimore me 150 nëngrupe, të cilat janë endemike (rriten vetëm në Shqipëri) dhe 160 lloje të tjera bimore të cilat janë nën-endemike në rajonin e Ballkanit.
Nuk duhet harruar pa përmendur që në Shqipëri numërohen 91 specie të cilat kërcënohen nga zhdukja në rang global, midis tyre edhe Pelikani Kaçurrel.
Studimi i realizuar nga PNUD ka arritur në përfundimin se Shqipëria ka edhe një numër të lartë racash autoktone bagëtish. Nga këto 9 raca autoktone janë në dhi dhe 5 në dele.
Ndërsa zona më e rëndësishme për hulumtime dhe burime gjenetike në Shqipëri ndodhet në veri të vendit tonë. Në malësi ka më shumë se 5200 ha pyje natyrore më shumë se 200 vjeçare me vlerë të lartë për biodiversitetin.
Gjithashtu në Shqipëri ndodhen edhe liqenet më të mëdha të Ballkanit, të cilët kanë rëndësi ndërkombëtare dhe krijojnë një habitat dhe ekosistem për rritjen e specieve të veçanta, duke siguruar një shumëllojshmëri të bimëve dhe të llojeve të kafshëve të egra.
Studimi thotë gjithashtu se edhe terreni që gjendet në zonën bregdetare të Shqipërisë, si ligatinat e Karavastasë, Patokut, Vilunit, Kune-Vaini, Orikumi etj, krijojnë kushte ideale për rritjen e specieve të lashta endemike dhe nën-endemike.
Burimi: Monitor
