Frika nga përhapja e një prej viruseve më vdekjeprurës të momentit, po zbraz qytetet më të mëdha në Kinë, pasi numri i viktimave ka arritur në 106 dhe i atyre të infektuar në mbi 4500.
Virusi është përhapur në të gjithë Kinën dhe të paktën në 16 vende në nivel global.
Wuhan, si dhe krahina më e gjerë Hubei, njihen si dy nga vendet që janë vendosur në “karantinë”, pasi është bllokuar totalisht transporti që lidh këto qytete me të tjera.
Por jo shumë larg Wuhan-it, rreth 450 km larg tij, ndodhet një tjetër qytet i madh që quhet Nanjing, dhe që është jo më shumë se 3 orë (me tren) larg epiqendrës së koronavirusit!
Ninjang është një qytet industrial me një port në lumin Yangtze (Chang Jiang) dhe një ndër qytetet më të populluara në Kinë me mbi 8 milionë banorë.
Por përmes fotove të dërguara ekskluzivisht për “iconstyle.al”, një shtetas shqiptar që jeton dhe punon prej vitesh në Pekin, T., na ka treguar se Nanjing është kthyer në një qytet fantazmë, ku nuk sheh këmbë njeriu. Fotot janë realizuar vetëm 15 minuta më parë, ora 20:45 dhe shihet qartë zbrazësia e qytetit e cila është e frikshme.
T., ndodhet aktualisht në Nanjing, ku ka shkuar për disa ditë pushimesh duke qenë se në Kinë festohet Viti i Ri Kinez.
“U nisëm për pushime për Vitin e Ri Kinez por përfunduam të ngujuar në hotel”, shprehet i riu për “iconstyle.al”.
Ai na tregoi se janë bërë kufizime të rrepta të transportit brenda dhe jashtë qyteteve dhe se bileta e tij për t’u kthyer në Pekin është anuluar. Veshja e maskave në publik tani është e detyrueshme në disa qytete kineze.
Sigurisht interesi jonë ishte të dinim se çfarë thuhet në Kinë! Kemi dëgjuar mjaft konspiracione në lidhje me numrin real të të vdekurve nga virusi dhe atë që fsheh qeveria atje.
T., shprehet se asnjë përveç qeverisë kineze nuk e di në realitet situatën. Lajmet që janë fake nuk paraqesin realitetin dhe ekziston frika se në thelb, shifrat e të prekurve mund të jenë “shumë më tepër sesa flitet”.
“Shumica e aktiviteteve janë mbyllur. Kinematë dhe vendet që kanë shumë lëvizje janë mbyllur. Vetëm qendrat tregtare dhe restorantet në Nanjing janë hapur. Varet nga qytetet, se këtu ku jam unë është më e qetë situata”!
I kërkuam të na dërgonte një foto të njerëzve që sheh në rrugë, por qe e vështirë:
“Të them të drejtën janë bërë si qytete fantazma”, shprehet T,.
Në Nanjing është parashikuar të mbahet Kampionati Botëror i Atletikës në mars, por kjo gjë po rishikohet pasi lideri i Kinës Xi Jinping paralajmëroi për “përhapjen e përshpejtuar” të koronavirusit në vend.
Të Dielën Shoqata Aziatike e Atletikës njoftoi se po anulonte Kampionatin e saj të Brendshëm, i cili do të zhvillohej në Hangzhou – 600 km larg Wuhan – në 12 dhe 13 shkurt për shkak të virusit, duke çuar në shtimin e spekulimeve brenda qarqeve të atletikës se Kampionati Botëror i Atletikës, mund të mos mbahet.
