Në 14 shtator të gjithë nxënësit e shkollave publike e jopublike do të rikthehen sërish në banka pas thuajse 6 mujash qëndrimi e mësimi në shtëpi. Institucionet tona arsimore nuk sigurojnë kushtet bazë të higjienës për t’u mbrojtur nga koronavirusi, ndaj pjesa më e madhe e nxënësve e prindërve të tyre ndihen të frikësuar për këtë rikthim. Përveçse duhet të jetojnë me shqetësimin se fëmijët e tyre do të jenë më të ekspozuar ndaj virusit në shkollë, prindërit duhet të përballen edhe me problematika të tjera.
Pandemia e Covid-19 u shoqërua me një krizë të thellë ekonomike, që sigurisht pati ndikim edhe në xhepat e shqiptarëve. Në këtë moment kur pritej të kishte më shumë solidaritet dhe ndihmë për ta kaluar më lehtë si situatë, duket se po ndodh krejtëisht e kundërta. Çdo ditë po del në dritë nga një shqetësim i ri, i cili ngarkon akoma më shumë listën e shpenzimeve.
Dyfishim çmimesh për transportin!
Burime pranë “Iconstyle” kanë zbuluar se një pjesë e mirë e shkollave jopublike në vend po e shfrytëzojnë këtë krizë për të vjelë akoma më shumë të ardhura nga prindërit e fëmijëve. Mësohet se disa institucione arsimore private që sigurojnë transportin për nxënësit përmes kompanive të ndryshme të transportit kanë dyfishuar çmimet. Nëse vitin e shkuar pagesa për transportin shkonte në 3000-4000 lekë këtë vit ka kapërcyer në 6000-8000 lekë të reja.
Ministria e Arsimit, Ministria e Transportit dhe Bashkia e Tiranës duket se nuk ushtrojnë asnjë lloj kontrolli, duke i lënë të qeta kompanitë të vendosin vetë në qetësi, pa asnjë arsye, rritjen e çmimeve. Ankesat nga ana e prindërve kanë qenë të shumta, por të gjitha bien në vesh të shurdhët, sepse drejtoritë pranë shkollave justifikohen se nuk kanë mundur të negocionojnë me kompanitë e transportit dhe i mbajnë me shpresë se situata mund të ndryshojë pas pak muajsh.
Çmime të kripura, cilësia e shërbimit s’është përmirësuar
Këto dyfishime në shifra vendosen pa asnjë lloj marrëveshje apo konsultimi, ndaj prindërit e kanë të vështirë ta kuptojnë arsyen pse ka ndodhur kjo gjë. Sipas tyre fugonat që shoqërojnë fëmijët në shkollë nuk kanë përmirësuar as cilësinë e shërbimit e madje as me çmimin e rritjes së karburantit nuk mund të justifikohen, prandaj për ta është e palogjikshme rritja e çmimit.
Nëse qeveria e Ministria e Arsimit nuk janë në dijeni për raste të tillë flagrante na duhet të presim që ndoshta mund të ketë një reagim tashmë që prindërit ngritën zërin. Megjithatë, përderisa askush nuk po merr parasysh kërkesën e studentëve për uljen e tarifës së shkollës pas mësimit online, vështirë që të presim diçka për rritjen e çmimit të transportit.
Nxënësit kërkojnë ulje tarifash
Sipas një sondazhi të realizuar nga iconstyle.al, 98 % e pjesmarrësve mendonin se tarifa e shkollës duhet të ulet nëse mësimi do të zhvillohet online këtë vit të ri akademik dhe vetëm 2% mendonin se nuk duhet të ulet. Kjo shifër tregon rëndësinë e madhe të kësaj çështjeje që i shqetëson familjet shqiptare, që po e vuajnë financiarisht pandeminë.
Shumë shpreheshin se kishin vështirësi financiare në këtë periudhë pandemie, që i ka gjetur prindërit e tyre pa punë. Dhe pikërisht në këto kushte që duhet të flasim për ulje tarifash, në vendin tonë ndodh e kundërta.
/Iconstyle.al
