Tërmeti i fuqishëm i 26 Nëntorit 2019 ishte një fatkeqësi e madhe që përfshiu vendin tonë dhe shkaktoi dëme të mëdha, duke lënë pa çati mbi kokë një pjesë të madhe të popullit dhe duke dëmtuar rëndë banesat e një pjese tjetër.
Shumë godina u shpallën të pabanueshme dhe u shembën për shkak të dëmeve të tërmetit, duke qenë se mund të rrezikonin seriozisht jetën e qytetarëve.
Mirëpo, mes gjithë kësaj fatkeqësie të shqiptarëve, Bashkia e Tiranës gjeti edhe kësaj here rastin të shfrytëzojë tërmetin për interesat e saj vetjake.
Një rast i denocuar në “Iconstyle.al” i përket muajit shkurt 2020, kur një pallat i vjetër në zonën e Komunës së Parisit në Tiranë (godinë mes dy rrugëve, Sulejman Delvina dhe Medar Shtylla), u shpall papritur i pabanueshëm nga Instituti i Ndërtimit, për shkak të dëmeve të supozuara, të shkaktuara nga tërmeti i 26 Nëntorit.
Në kundërshtim me këtë vendim, banorët e pallatit e rishikuan godinën me ekspertë privatë, të cilët dolën në përfundimin se pallati nuk kishte pësuar asnjë dëmtim serioz nga tërmeti dhe ishte ende i banueshëm.
Kështu, banorët iu drejtuan Gjykatës me vendimin e ekspertëve privatë, ndërsa Gjykata hodhi poshtë vendimin e saj të parë, duke e kthyer sërish pallatin në të banueshëm.
Megjithëse për çështjen u hap një gjyq, Bashkia e Tiranës nuk u dorëzua. Ajo vendosi ta nxjerrë pallatin për rindërtim (DS5), duke ia dhënë njërit prej antarëve të këshillit bashkiak.
Ky i fundit detyroi banorët e godinës të firmosnin për shembjen e pallatit dhe rindërtimin e tij, duke pretenduar se godina ishte e pabanueshme.
Në vend të godinës së shpallur të pabanueshme është planifikuar të ndërtohet një tjetër godinë më e madhe, megjithatë qytetarët janë detyruar me pahir të firmosin për shembjen e pallatit, teksa Bashkia në bashkëpunim me Institutin e Ndërtimit përfitojnë për shkak të një katastrofe natyrore.
Kjo nuk është hera e parë që në vendin tonë bëhen kaq hapur shkelje të tilla. Duke i detyruar të firmosin ose duke i lënë mes katër rrugëve qytetarët, Bashkia ka nxjerrë vazhdimisht njerëzit nga banesat e tyre, për të ndërtuar sipas interesave të saj.
Ky është një prej problemeve të mbartura të tërmetit, ndërsa “Iconstyle.al” ka raportuar që prej fillimit këto abuzime, që vazhdojmë t’i ndjekim dhe hetojmë hap pas hapi.
/Iconstyle.al
