Një 13-vjeçar shqiptar i cili vuan nga hydrocephalus, (uji në kafkë) që i shkakton autizëm dhe paralizë të këmbëve, rrezikon të deportohet nga Suedia në Shqipëri, ku nuk ka garanci për jetën e tij.
Familja Bajraktari në Suedi po lufton për mos deportimin e saj drejt Shqipërisë. Nëna e tij Evri Bajraktari, 54 vjeçe i ndërron pampersat ndërsa përdor një mekanizëm për ta ulur në karrigen me rrota në apartamentin e vogël në Finspang.
Kur ishte 8 muajsh Edionit iu bë një ndërhyrje në kokë dhe mjekët në Shqipëri i thanë se do të jetonte deri në moshën 8-vjeçare. Media e njohur belge “Aftoblandet” shkruan se ka ditë kur Edion është i qetë dhe dëgjon muzikë, por ka dhe momente kur ai ka dhimbje dhe godet veten e tij derisa del gjak apo godet kokën.
Familja ka aplikuar për azil për shkak të gjendjes shëndetësore të të birit, por i është refuzuar. Bordi i Emigracionit në Suedi mendon se djalit nuk i rrezikohet jeta nëse kthehet në Shqipëri ku dhe mund të vijojë mjekimi.
Në 2016-n ata u deportuan në Tiranë por në aeroport atyre iu desh të kërkonin ndihmë urgjente mjekësore për Edion, por kur mjekët e panë refuzuan ta merrnin përsipër. Kështu që familja u rikthye në Suedi.
Bordi i Migracionit ende nuk ka marrë një qëndrim nëse familja do të dëbohet apo jo, nërkohë që familja ka siguruar dhe një dokument nga spitali në Shqipëri ku vërtetohet se kujdesi mjekësor për Edion nuk do të ishte i mjaftueshëm në Shqipëri.
