Mëngjesin e kësaj të mërkure, mediat përcollën me shpejtësi lajmin e infektimit të mjekut Pëllumb Pipero, 16 ditë pas marrjes së dozës së parë të vaksinës antiCovid. Pipero do të ishte ndër mjekët e parë infeksionistë që do të vaksinohej në stadiumin “Air Albania”, si dhe i pari në mesin e tyre që preket nga Covid-19, ndonëse i vaksinuar. Pyetja e parë që lind natyrshëm eshte se çfarë tregon e gjitha kjo lidhur me efikasitetin e vaksinës Pfizer.
“Është një fenomen i njohur, por që nuk cënon efikasitetin e vaksinës, që përveçse nga kushtet si prodhohet e ruhet, ka dhe një element tjetër, që për faktin që është me dy doza, ndërtimi i antitrupave ndodh në një distancë 12-ditore nga doza e parë dhe pas një jave nga doza e dytë”, sqaroi drejtoresha e Institutit të Shëndetit Publik, Albana Fico.
Kështu, Fico ripërsëriti atë që është thënë vazhdimisht, që prej hedhjes në treg të vaksinave; injektimi i dozës së parë nuk mjafton, ndaj deri në marrjen e dozës së dytë duhet treguar kujdes maksimal. Mbartësit e vetëm gjysmës së vaksinës janë ende rrezik për vetveten dhe të tjerët. “Sa efektive është vetëm doza e parë e vaksinës ndaj Covid-19”- do të titullohej pak ditë më parë një artikull i BBC-së, në të cilën theksohej rëndësia e marrjes së sasisë së plotë të vaksinës dhe kujdesit që nuk duhet humbur gjatë ditës së pritjes për dozën e dytë. E thënë shkoqur, vetëm doza e parë nuk mjafton!
Në një studim të publikuar dhjetorin e vitit të shkuar, Pfizer-BioNTech do të deklaronte se vaksına është afërsisht 52% efektive pas marrjes së dozës së parë. Ndërsa me aplikimin e dozës së dytë, pas një jave, fillon rritja e kundërtrupave deri në 95%.
“Ne jemi në një situatë kur njerëzit që janë vaksinuar me dozën e parë, qëndrojnë të përballen me një infeksion nga Covid-19 dhe kjo është arsyeja që kemi ngulur këmbë që edhe gjatë procesit të vaksinimit, edhe pas, duhen zbatuar rregullat, maska dhe distanca”, do të shtonte më tej gjatë fjalës së saj, dhënë ditën e sotme, drejtoresha e Institutit të Shëndetit Publik.
Në ditën e parë të aplikimit të dozve të Pfizer-it, krahas Piperos u vaksinuan edhe infeksionisti Tritan Kalo, shefja e Spitalit Infektiv, Najada Çomo, si dhe kreu i qeverisë, Edi Rama. Vetëm pak ditë pas marrjes së dozës së parë, kryeministri do të merrte pjesë në një ceremoni fejese në Mamurras, mes Eldës dhe Burakut, një djali nga Stambolli. Në mesin e të pranishmëve, Rama do të fotografohej në disa çaste totalisht pa maskë dhe pa distancë fizike, duke dhënë kështu shembullin e gabuar në publik.
Infektimi i një ndër specialistëve të Shqipërisë dhe figurës më të besueshme e popullore, veçanërisht përgjatë muajve të karantinës, na rikujton se askush nuk gëzon imunitet ndaj virusit, pavarësisht dijeve dhe pozitave. E vetmja gjë që kemi në dorë, është kujdesi!
