Si në çdo fushë tjetër edhe në telekomunikacion bëhen bilance e arrihet në përfundime për çdo vit, dhe duket se në 2020 problemet në këtë sektor janë thelluar edhe më shumë në vendin tonë.
Autoriteti i Komunikimeve Elektronike dhe Postare (AKEP) ka publikuar së fundmi analizën e tremujorit të fundit të 2020, ku raportohet se “Vodafone Albania” e ka zgjeruar më tej pjesën e tregut. Kjo kompani celulare duket se ka rritur numrin e përdoruesve aktivë me 0.8% nga 46.7% që kishte në 2019, në 47.5% këtë vit. Dëshifruar në shifra, rezulton se “Vodafone” ka rreth 1.21 milionë përdorues.
“One” ka humbur 0.4% përdorues aktivë dhe ka rreth 36.4% të tregut, nga 36.8% që kishte një vit më parë. Të dhëna jopozitive vijnë edhe nga “AlbTelecom” që po ashtu ka pësuar një rënie me 0.4%, në 16.1%, nga 16.5% një vit më parë.
Treg i paqëndrueshëm dhe jokonkurrues
“iconstyle.al” ka adresuar shpeshherë problemin se tregu i telekomunikacionit në vendin tonë ka mungesë të theksuar konkurrence, e kjo është bërë edhe më e dukeshme me daljen nga tregu të “Plus communication”. Mungesa e këtij operatori të katërt në treg sjell një alternativë minus. Ligji i tregut është sa më shumë konkurrentë aq më mirë u shërbehet konsumatorëve, aq më shumë alternativa shërbimesh ofrohen dhe padyshim kjo shkon edhe në dobi të çmimit.
Mirëpo, në kushtet kur funksionojnë vetëm 3 operatorë dhe ata pa asnjë kontroll nga entet rregullatore, anomalitë e tregut janë mëse të pritshme. Jemi dëshmitarë të disa marrëveshjeve mes operatorëve në Shqipëri të telefonisë celulare për të mbajtur çmime të larta apo çmime oligopol. Ishte Qendra Shqiptare për Gazetari Cilësore, ACQJ, ajo e cila nëpërmjet një vëzhgimi të kryer pak javë më parë doli në përfundimin se të tria kompanitë celulare operojnë në treg me thuajse të njëjtat çmime që ndryshojnë me 100 lekë.
Pra, ALBtelecom, Telekom (ONE) dhe Vodafone vijojnë me oligopolin e tyre në tregun e kompanive celulare, duke patur zero konkurrencë mes njëra-tjetrës. Kjo nxjerr në pah se tregu celular me pakicë ka probleme të konkurrencës, teksa vihet re aplikimi i tarifave, të cilat ndikojnë negativisht në qëndrueshmërinë e konkurrencës midis operatorëve. (KLIKO)
Nënvizojmë këtu edhe oligopolin e shkurtit të këtij viti kur kompanitë celulare rritën me 200 lekë çmimet e të gjitha paketave mujore duke u justifikuar se klientët kërkojnë më shumë njësi komunikimi, vendim që u pezullua përkohësisht nga Autoriteti i Konkurrencës.
Shqiptarët paguajnë më shumë se kushdo, por kompanitë celulare me detyrime të prapambetura prej vitesh!
Sipas të dhënave nga Eurostat, prej 6 vitesh radhazi shpenzimet e qytetarëve shqiptarë për komunikimin mbeten në rritje. Në Shqipëri kostot reale të komunikimit janë 6.7% më të larta se mesatarja e Bashkimit Europian dhe sigurisht se vendet e rajonit.
Ndonëse Zyra për Mbrojtjen e Konsumatorëve ka bërë disa herë thirrje se çmimet duhet të ulen pa humbur kohë pasi janë shumë të larta, duket se këto thirrje kanë rënë në vesh të shurdhët. Çmimet janë shumë mbi koston dhe investimet tanimë janë bërë të vjetra dhe e kanë nxjerë koston e tyre. Numri i madh i abonentëve me çmimet e shërbimeve, u sjellin fitime të jashtëzakonshme kompanive celulare në vendin tonë.
Sakaq, në muajin nëntor AKEP informoi se operatorët ndër vite kanë krijuar detyrime të prapambetura. Nuk e dimë se ku i çojnë kompanitë celulare taksat që pretendojnë se paguajnë nëpërmjet nesh, po aq sa nuk dimë as përse tarifat e kompanive celulare në Shqipëri janë më shtrenjtë dhe me më pak oferta se tjetërkund në botë.
“Vodafone” dominon tregun nëpërmjet dredhive!
Ndonëse “Vodafone” vijon të zgjerojë territorin dihet tashmë se sa pakënaqësi ka krijuar ky operatorë në radhët e qytetarëve. Mirëpo, në një kohë kur siç e përmendëm tregu përmban vetëm 3 kompani celulare, duke mosofruar mundësi zgjedhjeje, dhe nga ana tjetër “Vodafone” kryen pafund veprime në kundërshtim me ligjin-çdo gjë është e kuptueshme.
Nuk e dimë nëse “Vodafone” do kishte të njëjtat shifra të përdoruesve aktivë nëse do i lejonte klientët e pakënaqur të largoheshin, pa i mbajtur me “pahir”. Prej javësh ju kemi bërë me dije se “Vodafone Albania” po përballet me një lumë largimesh të klientëve, teksa po bën çmos për t’i mbajtur me pahir ata që duan të largohen, ende në kompaninën e tyre. (KLIKO)
Për dy javë të paktë 1,000 klientë kanë bërë kërkesë për tu larguar nga kjo kompani dhe të gjitha këto kërkesa janë lënë pezullur. Ndonëse “Vodafone” thotë se ka rritur numrin e klientëve, kjo kompani celulare vijon mos të mbulojë një pjesë të mirë të territorit shqiptar, njësoj si dy operatorët e tjerë. Bëhet fjalë kryesisht për zona larg kryeqytetit dhe qyteteve të mëdha, ku operatorët nuk kanë interes ekonomik për të vendosur rrjetet e tyre të shërbimit, për shkak të numrit të paktë të abonentëve. (KLIKO)
Në mënyrë të qartë dhe në shumicë institucionet rregullatore të tregjeve dhe AKEP, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Kush e drejton realisht këtë treg? Monopolet, politika e jashtme, krimi ekonomik? Gjithçka mund të duket e kuptueshme, por perandoria e kompanive celulare jo. Mbrojtja e konsumatorit është akoma në nivele OJF-sh që luftojnë për mbijetesë, e që në kërkim fondesh, duan ta mbajnë mirë me të gjithë.
