Ndërkohë që hapja e shkollave në Shqipëri ka krijuar shumë frikë dhe pasiguri në lidhje me përhapjen e virusit, pas Maqedonisë së Veriut, pandemia ka detyruar Greqinë që të hapë shkollat një javë më vonë sesa pritej.
Shkollat ishin planifikuar të hapeshin më 7 shtator, por me një rritje të fundit të rasteve të COVID-19, autoritetet vendosën ta shtyjnë në 14 shtator, tha Ministrja e Arsimit Niki Kerameus.
Vonesa sipas saj është e nevojshme për të lejuar që njerëzit të kthehen nga pushimet dhe të kalojnë një periudhë në shtëpi, në mënyrë që të shihet nëse kanë simptoma ose jo të virusit përpara se të dërgojnë fëmijët në bankat e shkollave.
Autoritetet shëndetësore greke njoftuan të martën 207 raste të reja me koronavirus, ndërsa pesë vdekje u regjistruan gjithashtu në 24 orët e fundit. Situata duket shqetësuese edhe në vendin tonë, ku në 24 orët e fundit, 93 persona janë konfirmuar pozitivë dhe 6 të tjerë kanë ndërruar jetë.
Kur Shqipëria ka këtë bilanc në verë, çfarë pritet të ndodhë në muajit në vijim kur të hapen shkollat dhe si do e përballojmë këtë krizë shëndetësore? Vjeshta po troket dhe parashikimet e ekspertëve flasin për një valë të dytë të virusit që do jetë më e fortë se e para.
Së pari, do ju shtojmë barrën mjekëve më të keqpaguar në Europë
Ministria e Shëndetësisë, do të detyrojë mjekët shqiptarë, (më të keqpaguarit në Europë) t’u shërbejnë qytetarëve pas rritjes së infektimeve.
Shqipëria ka numrin më të ulët të mjekëve për banorë në rajon dhe burime të sigurta pranë Infektivit kanë treguar për iconstyle.al se mjekë e infermierë, jo të fushës, janë detyruar nga instancat përkatëse për tu bërë pjesë e stafit të shërbimit infektiv, madje burimet shtojnë se janë kërcënuar edhe me heqje të licensës së infermierit.
Bluzat e bardha jo vetëm nuk kanë njohur rritje pagash, por janë prekur shumë nga koronavirusi. Nga QSUT në Tiranë dhe nëpër spitalet e poliklinikat e shumë rretheve, ata janë infektuar dhe në raste ekstreme edhe kanë humbur jetën.
Së dyti, fëmijët nuk janë të imunizuar plotësisht nga ky virus
shtyrja e hapjes së shkollave është nevojshme në një kohë që rrezikojmë një rritje të numrit të infektimeve. Është e vërtetë që fëmijët janë më imunë ndaj virusit por mund të jenë mbartës dhe transmetues të heshtur të COVID-19 ndaj prindërve, gjyshërve apo stafit të shkollës.
Madje sipas një studimi të fundit nga një grup studiuesish ekspertë në Spitalin e Përgjithshëm të Masaçusets, fëmijët e moshës pediatrike kanë një ngarkesë virale shumë më e lartë se të rriturit në kujdes intensiv.
Edhe pse ata nuk zhvillojnë simptomat e infeksionit, kanë më pak receptorë për patogjenin Sars-CoV-2 (proteina tani e njohur ACE2), por kanë një numër të konsiderueshëm të grimcave virale Covid.
“Fëmijët nuk janë imunë nga ky infeksion – tha Alessio Fasano, pediatër në Shkollën Mjekësore Harvard dhe bashkëautor i studimit – dhe ne nuk mund t’i përjashtojmë ata si bartës asimptomatikë të virusit që mund ta përhapin infeksionin në shtëpi ose në shkollë”.
Së treti, mbajtja mbyllur e shkollave nuk ishte opsion, por mësimi online po
Ndonëse mbajtja mbyllur e shkollave nuk ishte opsion sipas deklaratës së djeshme të kryeministrit Edi Rama, mësimi online ishte, të paktën deri sa të mund bëheshin vaksinat për gripet sezonale.
Por ai rezultoi të jetë një dështim i Ministrisë së Arsimit, edhe pse nxënësit, mësuesit apo prindërit janë ushqyer prej vitesh me idenë e shkollave dixhitale. Kur erdhi koha e duhur për t’i përdorur ato në pandemdi, mësimi online dështoi.
Së katërti, mungesë pajisjesh të kujdesit intensiv dhe medikamenteve
teksa spitalet raportojnë çdo ditë vdekje nga virusi, të shumtë janë personat që janë larguar drejt Turqisë (apo edhe vendeve të tjera) për të marrë shërbimin e nevojshëm mjekësor që vendi ynë nuk e ofron.
Sistemit shëndetësor shqiptar nuk ofron kushtet më minimale të medikamenteve, apo atë të pajisjeve si aparatura e kujdesit intensiv që quhet ECMO, një pajisje shumë e vlefshme për të shpëtuar jetët e pacientëve të intubuar. Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne, por në vend të saj, qeveria merret me tendera kryesisht për blerje maskash, ku të gjithë janë zhvilluar me negocim dhe pa garë.
Së pesti, maskat e detyrueshme, por a nuk duhet të jenë falas?
meqenëse ministria po i dërgon fëmijët në shkollë në mes pandemie, e në mëshirë të virusit, a nuk duhet t’ua sigurojë vetë maskat fëmijëve, ashtu siç kanë bërë
fqinjët, Italia dhe Greqia në prag të fillimit të vitit të ri shkollor?
Pak ditë më parë, ministri i Brendshëm grek, Takis Theodorikakos zbuloi se qeveria do të mbulojë nevojat për maska të të gjithë nxënësve dhe mësuesve përmes autoriteteve lokale, në kontekstin e masave të reja për koronavirusin dhe hapjen e shkollave. Edhe Italia siguroi 11 milionë maska falas çdo ditë për të gjitha shkollat (lexo këtu).
Për çfarë kushtesh duhet të flasim kur edhe çmimi për tamponin e Covid-19 që kryhet në laboratorët privatë për të gjithë ata persona që do të lëvizin jashtë vendit shkon në 120 mijë lekë të vjetër, më i larti në rajon (shiko këtu).
Pra me hapjen e shkollave numrat vetëvetiu do të rriten, dhe këtë e dimë nga praktikat ndërkombëtare. Çështja që shtrojmë është nëse jemi të përgatitur t’i përballojmë këto rritje të infektimeve, dhe praktika ka treguar që jo!
/Iconstyle.al
