Sheshi “Skënderbej” në kryeqytet kishte marrë pamjen e një ferme gjigante sot në mes të Tiranës.
Shkak u bë nisja e një tjetër panairi, që quhet “Shqipëria Punon Tokën”, ku morën pjesë rreth 400 fermerë me prodhimet e tyre, sipërmarrës të agropërpunimit, agroturizmit, por edhe insitucioneve financiare që kreditojnë bujqësinë.
Nuk mungoi as ferma me kafshë të ndryshme që u improvizua në një hapësire të veçantë të sheshit “Skënderbej”. Gjithashtu Harta e Shqipërisë është e vendosur në sipërfaqen e sheshit së bashku me një balonë, duke dhuruar një pamje të mahnitshme e parë nga sipër.
Në mbrëmje do të ketë edhe një koncert nga kuarteti Peter Pan dhe argëtime të tjera për ta kaluar sa më bukur fundjavën.
Kryeministri Edi Rama bëri një vizitë nëpër stendat e panairit, për të parë nga afër prodhimet bujqësore dhe për të takuar fermerët e ardhur nga i gjithë vendi.
/Ora News
