Gjyqi për vrasjen e 22-vjeçarit Marvi Mihali vazhdon, ndërsa situata në seancën e sotme te Krimet e Rënda raportohet se ishte e tensionuar.
Sipas raportimeve, prindërit e viktimës u konfliktuan verbalisht me familjarët e të pandehurit Eugen Bitraj, ndërsa u kërkua ndërhyrja e efektivëve të policisë që të qetësohej situata.
Të pandehur për ngjarjen janë Eugen Bitraj, Dejvi Bitraj, Kridens Alla dhe Marsel Alla, tre të fundit janë cilësuar si bashkëpunëtorë në krim dhe u liruan nga trupi gjykues në maj të këtij viti.
Marvi, djalë i vetëm i familjes Mihali, humbi jetën pas një sherri të dhunshëm që nisi për arsye banale, pranë stadiumit “Dinamo” në korrik të 2017-s.
Si ndodhi sherri:
Sherri nisi në lokal mes 19-vjeçarit Dejvi Bitraj dhe 22-vjeçarit Marvi Mihali për një karikues telefoni. Marvi kishte blerë një telefon te Dejvi dhe po i kërkonte edhe karikuesin.
Ky i fundit e tërhoqi jashtë Marvin në parkingun e makinave të lokalit dhe pasi janë rrahur ka thirrur në ndihmë kushëririn dhe shokët e tij. Në ndihmë të Dejvit kanë shkuar Eugen Bitraj (autori), Kridens Alla, 19 vjeç dhe Marsel Alla, 23 vjeç.
Gjatë konfliktit Eugen Bitraj nxori thikën dhe goditi shtetasin Marvi Mihali, i cili për pasojë gjeti vdekjen në spital.
