Përpara se të bëhej pjesë e botës së muzikës, Era Istrefi nuk ishe edhe aq çapkëne sa tani. Duke pasur përkrah dy motrat e saj të mëdha Norën dhe Nitën, ajo është rritur duke kultivuar dashurinë për të bukurën dhe pasionin për muzikën.
Në atë kohë, Era ishte e panjohur sepse nuk ishte këngëtare, ndërsa sot (22 vjeç) ajo është një nga femrat më të përfolura të show-bizit shqiptar për shkak të paraqitjes së saj, stilit unik që e bën të jetë ndryshe nga të tjerat dhe muzikës së veçantë që prodhon.
Edhe pse sot e njohim si vajzën e “Bon Bon”, jo të gjithë e dinë që Era Istrefi, qysh në moshë fare të vogël ka marrë pjesë në një film. Në vitin 2001 kur ajo ishte vetëm 6 vjeçe, ka qenë pjesë e filmit “Nënë”. Fotografia e mëposhtme e realizuar në sheshin e xhirimit, tregon Erën e vogël, përkrah aktorëve të tjerë pjesëmarrës në film.
Kur publikoi këngën e saj të parë “Mani për money”, Era Istrefi identifikohej kryesisht si motra e vogël e Nora Istrefit. Por rezultoi se suksesi i saj, do ta tejkalonte atë të Norës duke qenë se kënga “Bon Bon”, e bëri të njohur në tregun ndërkombëtar muzikor dhe i siguroi këngëtares një kontratë me kompaninë gjigande ‘Sony Music” dhe pak kohë më parë, Era u zhvendos në SHBA për të filluar përgatitjet për karrierën e saj tashmë ndërkombëtare.
Pasi u bë e njohur me këngën “Mani për Money” në vitin 2013, duke marrë mjaft kritika pozitive, Era solli një sërë projektesh të tjera muzikore si, “A po don”, “E Dehun” dhe “13”, të cilat arritën sukses të njëjtë. Në qershor të viti 2014, ajo fitoi tre çmime në Videofest për videot e saj muzikore, gjithashtu dhe çmimin “Best New Artist”.
Në vitin 2015, Era arriti shumë sukses me këngën “Njo si ti” duke arritur mbi një milion shikime në YouTube brenda javës. Dueti i saj i parë u bë në bashkëpunim me reperin kosovar Ledri Vula, dhe u titullua “Shumë pis” duke u bërë menjëherë një hit veror.
Në janar 2016, Era Istrefi fitoi një vëmendje të madhe ndërkombëtare me këngën “Bonbon”, duke u krahasuar edhe me Sia apo Rihanna. Për shkak të këtij suksesi, ajo lidhi kontratë me shtëpitë e mëdha diskografike amerikane Sony Music Entertainment dhe Ultra Music në shkurt të vitit 2016.
Po si u përfshi Era në industrinë e muzikës? Ajo e ka shprehur vetë në një intervistë për revistën prestigjioze “Vogue”, se ka qenë e talentuar gjithmonë, por thjesht nuk ka dashur që të bëhet publike deri sa mbushi 19 vjeç, kur doli për herë të parë në skenë.
“Për 10 vjet unë këndoja vetëm për qejfin tim. Unë nuk kam bërë asnjë aktivitet. Shkoja në shkollë, në fakt. Isha e përqendruar në mësimin dhe studimin. Dhe dyshimi “A dua të jem e famshme? A dua të jem një këngëtare? dhe nëse doja të ndiqja shkollën. . . sepse unë me të vërtetë kisha dyshime. Por unë isha shumë e kënaqur me talentin tim dhe këtu e kuptova se dua të këndoj. Kur isha 19 vjeç, publikova këngën time të parë, të quajtur “Mani për Money” dhe më pas vazhdova për tre vjet”, ka thënë Era për “Vogue”.
Pak kohë më parë, në Budva të Malit të Zi, në një prej klubeve më të njohura në mbarë Evropën, Top Hill, ishin mbledhur mijëra adhurues për të dëgjuar një performancë të këngëtarit boshnjak Dino Merlin. Por, para performancës së një prej legjendave të muzikës ballkanike, Dj i cili u përkujdes të ndezte atmosferën vendosi këngën e Era Istrefit.
Për afro 5 minuta Era Istrefi dhe hiti i saj “Bon Bon” u dëgjua në Top Hill, teksa çudit fakti se përmendësh këtë këngë e dinin edhe shtetasit serbë dhe madje nuk ndaleshin duke kënduar, shkruan Telegrafi.
Suksesi ndërkombëtar i këngës “Bon Bon” të Era Istrefit po vazhdon ende, kësaj radhe kjo këngë është bërë pjesë e video lojës së famshme ”Just Dance 2017“, në play listën zyrtare të këtij viti.
Kjo videolojë iu mundëson njerëzve, që të dirixhojnë lëvizjet e kërcimit, të personit brenda lojës, me anë të ritmeve të këngës, në këtë rast, të këngës “Bon Bon”. Kujtojmë që kjo këngë, suksesin e saj të jashtëzakonshëm, e ka dëshmuar edhe me 130 milion klikime në youtube, të cilat janë në rritje e sipër.
Burimi: Iconstyle
