Deputetja e Partisë Demokratike, Majlinda Bregu ka sqaruar kuptimin e fotos me këpucët e shtrenjta, për të cilat u bë bujë në media pak kohë më parë.
E ftuar në emisionin “Vila 24”, deputetja u është përgjigjur pyetjes së studentëve rreth shpenzimeve për veshjet firmato, Bregu foli dhe për këpucët e famshme, foton e të cilave publikoi në njërën nga ditët e protestave të opozitës.
“Unë si natyrë provokative që jam, i vura në lojë mediat. Ajo e këpucëve ishte vendimi im, i postova pa koment, pa asgjë, me një këmbë dhe e lashë me kaq. Në të gjitha mediat shoh këpucët, nxorën çmimin, çdo gjë, pastaj shkrova që më vinte keq se edhe kësaj modeleje iu ngatërruan këmbët në politikë. Protagonistët e prodhimit të këtij lajmi e ndien veten të vënë në lojë. Ne shqiptarët kemi abuzuar pak me lirinë e shpërndarjes së thashethemit si lajm”, tregoi deputetja dhe shtoi se e gjithë kjo histori e kishte bërë për të qeshur.
