Një foto e postuar nga aktori i humorit, Bes Kallaku në rrjetet sociale, teksa shfaqej bashkë me gjyshin e tij, Ganiun pasi kishin shkuar për gjueti, ka ngjallur polemika të shumta ditën e diel.
Fotoja u publikua nga vetë Besi duke krijuar keqkuptime në lidhje me gjuetinë e cila është e ndaluar me ligj në Shqipëri. Por Bes Kallaku ka sqaruar rastin në fjalë, duke thënë se kjo është një fotografi e bërë disa vite më parë. Ai u shpreh se nuk ka shkelur asnjë ligj dhe se ka një arsye të fortë që e ka ripostuar. Gjyshi i tij ka ndërruar jetë e ajo ishte fotografia që i pëlqente më së shumti me të.
“Të dashur miq dhe ju komentues që shihni hile gjithkund, tipik shqiptar i pandreqshëm, që kujtoni se do merrja Ganiun (gjyshin) dhe do dilnim të thyenim ligjet, të shkatërronim shtetin duke dalë për gjueti kur është e ndaluar. Foto është bërë para 3 vitesh, e kam hedhur në ditën kur Ganiu, që më rriti në fshat, u shtrua në spital në gjendje të rëndë dhe foto që kisha me të ishte kjo, dhe s’doja ta humbisja. E postova. Dhe meqë ra llafi, ai mbrëmë ndërroi jetë”, sqaron Bes Kallaku.
