Një lajm i zi për artin shqiptar pasi artistja e madhe, Vitore Sallaku është ndarë nga jeta. Ajo ka qenë akrobate e njohur në cirkun shqiptar. Jo vetëm kaq por ajo ka qenë një ndër pionieret e cirkut.
Por së fundmi Vitore Sallaku mbylli sytë pa bërë shumë bujë.
Ajo ishte vajza e profesorit Lorenc Rasha, i cili u pushkatua në kohën e diktaturës. Mirëpo ajo shkëlqeu në karrierën e saj për më shumë se 35 vite në skenë. Numrat e saj kanë qenë të jashtëzakonshme.
Artisja e madhe, Vitore u specializua në Kinë dhe jo vetëm.
“Im atë, Lorenc Rasha, (profesor doktor në linguistikë), si intelektual që ishte e dinte se unë isha e talentuar për këtë profil që mora, si akrobate. Dëshira e tij ishte që të më çonte në Austri atje ku kishte mbaruar ai shkollën. Megjithatë ngjarjet ndodhën që tim atë e pushkatuan, por kjo situatë nuk ndikoi mes nesh, sepse unë isha specializuar ( në Kinë dhe Bashkim Sovjetik) në atë që bëja. Gjithashtu drejtori i Cirkut, më kishte mësuar që të isha e kujdesshme në këtë drejtim, sepse në atë kohë mund të përfundoja menjëherë në burg. Pasi u martova me Skënderin njëherë e thërritën dhe i thanë: “Çfarë do të bësh me Vitoren?” Ai u tha: ‘Ajo është gruaja ime, nëna e dy fëmijëve. Urdhëroni teserin e Partisë, sepse ku të jetë ajo do të jem dhe unë. Nëse keni ndërmend që t’i bëni ndonjë gjë, ne jemi bashkë’”, pati rrëfyer ajo më herët.
“Një grua e rrallë, energjike, një artiste e talentuar, një nga themelueset e Cirkut shqiptar, u nda nga ne. Akrobatja Vitore Sallaku ka lënë pas kaq shumë kujtime të bukura dhe u ka falur kaq shumë gëzim njerëzve, saqë largimi do të jetë vetëm fizik! Ajo ishte dhe do të mbetet një shkollë për brezat e rinj!”, ka shkruar ministrja Elva Margariti.
