Një lajm i trishtë ka mbërritur sot në redaksitë e mediave. Gazetarja dhe drejtuesja e njohur Rudina Dervishi është ndarë nga jeta të martën, më 12 shtator, në moshën 53- vjeçare.
Gazetarja ka humbur betejën dy vjeçare me sëmundjen e rëndë të kancerit të gjirit, duke lënë pas bashkëshortin, tre djemtë dhe nënën.
Rudina kishte një karrierë prej 25 vitesh në televizion. Për publikun ajo njihet si drejtuesja e emisionit televiziv “Ditari” të Zërit të Amerikës.
Por jo vetëm kaq. Dervishi ka dhënë një kontribut të çmuar me profesionalizmin e saj si gazetare duke mbuluar tema të ndryshme nga politika, ekonomia, të drejtat e njeriut dhe të gruas, po ashtu edhe në art.
Ikja e saj e parakohshme është një humbje e madhe për të gjithë median, për familjen dhe për kolegët e saj të Shërbimit Shqip të Zërit të Amerikës.
