Gazetari Brent Renaud i prestigjozes “New York Times”, 50 vjeç, u qëllua për vdekje në periferi të Kievit nga forcat ruse, njoftoi policia e Kievit të dielën.
Cliff Levy, zëvendës kryeredaktor në “New York Times”, tha se i gjithë personeli i gazetës u trishtua nga vdekja e tij.
Sipas “New York Times”, Renaud kishte punuar për vite të tëra për këtë medium, por që prej 2015-s nuk punon më për ta, që do të thotë se në Ukrainë nuk ishte në detyrë si gazetar i “New York Times”.
“Jemi thellësisht të pikëlluar kur dëgjojmë për vdekjen e Brent Renaud. Brent ishte një regjisor i talentuar që kishte kontribuar në The New York Times gjatë viteve. Edhe pse ai kishte kontribuar në The Times në të kaluarën (më së fundi në 2015), ai nuk ishte në detyrë për The Times në Ukrainë”, ka shkruar Times në Twitter.
Policia e Kievit gjithashtu tha se Renaud ishte me dy gazetarë të tjerë me të cilët po filmonte arratisjen e refugjatëve, kur u kapën nga të shtënat me armë në një postbllok. Dy gazetarët e tjerë që ishin me Renaud u dërguan në spital, kurse Renaud u qëllua në qafë dhe vdiq menjëherë.
Juan Arredondo, njëri prej gazetarëve që u dërgua në spital pas incidentit, i tha një gazetari italian se ishte me Brent Renaud kur ata u sulmuan.
“Ishim nëpër një nga urat e para në Irpin, duke shkuar për të filmuar refugjatët e tjerë që largoheshin, dhe hipëm në një makinë, dikush na ofroi të na çonte në urën tjetër dhe kaluam një pikë kontrolli dhe ata filluan të qëllojnë mbi ne. E pashë Brent Renaud duke u qëlluar në qafë dhe ne u ndamë”, that ai.
Këshilltari për sigurinë kombëtare të Shtëpisë së Bardhë, Jake Sullivan tha për “CBS News” se qeveria e SHBA-së do të konsultohej me ukrainasit për të përcaktuar se si u qëlluan gazetarët.
“Kjo është pjesë përbërëse e asaj që ka qenë një agresion i pacipë nga ana e rusëve, ku ata kanë shënjestruar civilët, ata kanë shënjestruar spitalet, kanë shënjestruar vendet e shenjta dhe kanë shënjestruar gazetarët,” tha zoti Sullivan.
Gazetari Brent Renaud zakonisht punonte së bashku me vëllain e tij, Craig Renaud, por nuk dihet nëse ata ishin të dy në Ukrainë.
Vëllezërit kanë punuar në disa zona lufte, duke përfshirë Irakun, Afganistanin, Egjiptin dhe Libinë. Në vitin 2004 ata ishin të përfshirë me ushtrinë amerikane në Irak dhe po filmonin kur një sulm me raketë goditi një bazë ushtarake amerikane në Bagdad, duke vrarë katër ushtarë dhe duke plagosur rëndë dy të tjerë.
Ata kanë fituar disa çmime kryesore për punën e tyre, duke përfshirë një “Peabody” për një seri që ata bënë për “VICE News” në një shkollë të Çikagos për studentët inovatorë. Dyshja janë nominuar edhe për disa çmime “Emmy”. në faqen e tyre të internetit thuhet se ata jetojnë dhe punojnë në New York City dhe Little Rock, Arkansas.
