Pas tre muajsh betejë të heshtur mes jetës dhe vdekjes, ka ndërruar jetë Arjan Kraja, burri trim që nuk hezitoi asnjë çast për të shpëtuar jetën e dy fëmijëve në plazhin e Velipojës. Ishte një ditë e zakonshme vere, por një akt i jashtëzakonshëm e bëri atë njeri të pavdekshëm në kujtimet e të gjithë atyre që e njohën.
Kur pa dy të miturit në rrezik për jetën, ai u hodh në det pa menduar për veten. I shpëtoi nga vdekja, por vetë nuk u kthye më si më parë. Arjan Kraja, menjëherë pas aktit, pësoi një ishemi të rëndë cerebrale dhe nuk arriti të rikuperohej.
Sot, zemra e tij pushoi së rrahuri, por jo kujtimi për të. Një njeri i zakonshëm, me një akt të jashtëzakonshëm, që dëshmoi se heronjtë jetojnë mes nesh, pa uniforma, pa lavdi, por me zemrën plot.
Operatori i Sistemit të Shpërndarjes së Energjisë (OSSH), ku ai shërbeu me përkushtim si shef grupi për shumë vite, shprehu dhimbje të thellë për humbjen.
“Arjani do të mbahet mend për ndershmërinë, profesionalizmin dhe mirësinë e tij njerëzore”, thuhet në reagimin e OSSH-së.
Arjan Kraja la pas një shembull që pak guxojnë ta ndjekin: të vendosësh jetën e të tjerëve përpara tëndes. Një hero i heshtur, që iku në paqe, duke shpëtuar jetë.
