Vetëm pak ditë më parë një ngjarje e rëndë ka ndodhur në shkollën “Rilindja” në Kavajë.
Një 14-vjeçare ka denoncuar 12 bashkëmoshatarë të saj për abuzim seksual. Ata e kanë detyruar atë të kryejë marrëdhënie seksuale kundrejt dëshirës, duke i bërë shantazh.
Ditën e djeshme Policia ka arrestuar 7 prej tyre, ndërsa më herët kishte qenë Gjykata e Kavajës e cila kishte vendosur masën e sigurisë “arrest me burg” për ta.
Me anë të shantazhit, që prej nëntorit deri në janar vajza ka kryer marrëdhënie seksuale me adoleshentët, në ditë të ndryshme. Sipas informacioneve, ishin vetë prindërit e vajzës që zbuluan skandalin dhe detyruan të bijën që të bënte denoncimin në polici.
“Report Tv” mëson se 14-vjeçarja e ka bërë kallëzimin për 12 bashkëmoshatarë (14-17 vjeç) më datë 29 janar në Komisariatin e Policisë Kavajë, ndërkohë që autoritetet e kanë ekzekutuar urdhrin e Prokurorisë pranë Gjykatës së Shkallës së Parë Durrës vetëm mbi 7 nga 8 për të cilët ishte caktuar masa e sigurisë “arrest me burg”, pasi njëri prej tyre nuk është gjendur në banesë.
Për rrjedhojë personi i fundit, 15 vjeç është shpallur në kërkim.
Raportohet se 14-vjeçarja ka qenë e lidhur me njërin prej djemve, i cili pasi ka kryer marrëdhënie seksuale me të, e ka shantazhuar duke i thënë se një shoku i tij ka në duar video me momente të tyre intime dhe e ka detyruar atë të kryejë marrëdhënie seksuale me 11 të tjerë.
