Një ngjarje tragjike ka ndodhur në Tiranë, ku një grua e huaj, rreth 30 vjeç, është gjetur e vdekur në një apartament të marrë me qira.
Policia njofton se ngjarja ka ndodhur rreth orës 12:55, në rrugën “Gjon Muzaka”, dhe se gjatë kontrollit paraprak të trupit janë gjetur plagë të dyshuara të shkaktuara nga një mjet prerës.
Viktima dhe partneri i saj, kishin marrë me qira apartamentin në datën 19 shkurt. Ata kishin paguar për 10 ditë qëndrimi në banesën ku gruaja u gjet e pajetë.
Në vijim të veprimeve, Policia bëri të mundur edhe identifikimin e viktimës, shtetases Ryyan Alwan 24 vjeçe, e cila, së bashku me bashkëshortin e saj, shtetasin Fadi Alwan 49 vjeç, rezultojnë të jenë shtetas palestinezë.
Nga të dhënat e deritanishme hetimore, dyshohet se autori i ngjarjes është larguar menjëherë jashtë territorit të Shqipërisë, pas kryerjes së krimit, i cili dyshohet të ketë ndodhur disa ditë më parë.
Grupi hetimor po vijon punën për përcaktimin e saktë të kohës së ngjarjes, nëpërmjet ekspertizës mjekoligjore dhe analizimit të provave të sekuestruara.
