Një i mitur ka mbetur i vrarë në Shkodër pasditen e sotme, pasi është goditur me thikë. Ngjarja e rëndë ka ndodhur rreth orës 19:30 të 14 tetorit në lagjen “Skenderbeg”.
Rrethanat e ngjarjes janë ende të paqarta, por 15-vjeçari Emiljano Gjoni është goditur me thikë nga një person, i cili më pas është larguar nga vendi i ngjarjes. Policia e Shkodrës në një njoftim për ngjarjen thotë se 15-vjeçari është goditur me thikë pas një sherri për motive të dobëta dhe si pasojë e plagëve të marra ka ndërruar jetë në spital.
“Rreth orës 19:30, në zonën e Fermentimit, në lagjen “Skenderbeg”, dyshohet se gjatë një konflikti për motive të dobëta, një shtetas ende i paidentifikuar ka dëmtuar me mjet prerës (thikë), një të mitur 15-vjeç, i cili si pasojë e plagëve të marra ka ndërruar jetë në Spitalin Rajonal Shkodër. Shërbimet e Policisë kanë shkuar menjëherë në vendngjarje ku po punojnë për identifikimin dhe kapjen e autorit”, njoftoi policia.
Ndërkohë, vijon puna e grupit hetimor, për sqarimin e plotë të rrethanave të ngjarjes.
