Një ngjarje tronditëse ka ndodhur sot në lagjen nr. 14 të qytetit të Korçës, ku një vajzë 13-vjeçare ka tentuar vetëvrasjen duke u hedhur nga ballkoni i shtëpisë së saj.
Burime nga vendngjarja bëjnë me dije se ambulanca ka mbërritur menjëherë dhe e mitura është transportuar në Spitalin e Korçës me shenja jete, ku aktualisht ndodhet nën kujdesin e mjekëve. Ajo ka rënë nga kati i tretë i pallatit dhe fatmirësisht ka marrë ndihmën e menjëhershme mjekësore.
Jashtë kamerave, nëna e saj ka dhënë një deklaratë të fortë, duke denoncuar dhunën dhe bullizimin që vajza ka përjetuar në lagje. Ajo tregon se vajzën e kanë sulmuar edhe fizikisht fqinjët dhe shokët e shkollës. “Para dy ditësh, vajza u godit në kurriz nga një tjetër vajzë. Kur shkova t’i mbroj, edhe mua më goditën dhe më morën në polici. Ndërkohë, vajza u hodh nga kati i tretë, pasi e tallnin në lagje duke i thënë ‘mamin ta morën në polici, jeni fshatarë’”, rrëfen nëna.
Ajo shton se situata e dhunës në familje është e komplikuar, pasi bashkëshorti i saj ndodhet në burg për dhunë, dhe ajo kujdeset për katër fëmijë. Rasti nxjerr në pah problematikën e bullizmit dhe dhunës ndaj të miturve, si dhe nevojën urgjente për masa mbrojtëse ndaj fëmijëve në komunitet. Autoritetet lokale dhe institucionet përkatëse janë njoftuar për të marrë masat e nevojshme për të parandaluar tragjedi të ngjashme.
