Pavarësisht luftës së vazhdueshme me Rusinë, shtëpitë në Ukrainë po rezervohen më shpejt se një qytet bregdetar gjatë pushimeve të verës.
Të mërkurën, llogaria e njohur në “Instagram” – Quentin.Quarantino – u shfaq në mediat sociale për të njoftuar një iniciativë për të mbështetur financiarisht familjet në Ukrainë duke rezervuar një apartament Airbnb.
Brenda një dite, qindra njerëz u bashkuan për këtë mision dhe rezervuan një Airbnb në zonat ku Ukraina është prekur më shumë.
Kësaj nisme i është bashkuar edhe një vajzë shqiptare me emrin Alesia Burnazi, 27 vjeçe, e cila ka përfunduar masterin në LSE për të drejtat e njeriut. Ajo rezervoi dy Airbnb në Ukrainë, duke thënë për “New York Post” se ndjente një detyrim moral për të ndihmuar.
E ftuar në emisionin “Dita Jonë”, ajo foli për këtë eksperiencë ku u shpreh se “kjo ishte një mënyrë shumë e shpejtë për t’ju çuar ndihmë” të prekurve nga lufta në Ukrainë.
“Unë personalisht prenotimin që kam bërë, pasi ato ditë ishte shumë e nxehtë zona e Karkiv, aty vendosa që të prenotoj për t’i dhënë një ndihmë sado solidare dhe të vogël kujtdo që mund t’i merrte këto para. Është një çmim i ulët, normalisht siç kanë qenë. Vlen nga 20 euro ose më shumë. Më e rëndësishme është vlera e solidaritetit”, tha Alesia.
Për përmendjen e emrit të saj në gazetën prestigjioze “New York Post”, ajo kishte vetëm kaq për të thënë:
“Ky kontakt u realizua nëpërmjet rrjeteve sociale. Nga posti i kësaj ‘meme page’, Quentin.Quarantino, dikush më kishte pikasur në komente dhe Meri e cila zë pjesën e ‘real estate’ në ‘New York Post’ më dërgoi një mesazh dhe më tha nëse mund të më citoj dy-tre fjali”, u shpreh ajo.
Vlen për t’u duartrokitur nga të gjithë, ky veprim i Alesias dhe kjo nismë humanitare, të cilës ftojmë t’i bashkohen sa më shumë njerëz, për të ndihmuar personat e prekur nga lufta.
Airbnb zbuloi se vetëm në dy ditët e fundit, më shumë se 61,000 persona kishin rezervuar apartamente në Ukrainë – 34,000 prej të cilave ishin rezervuar nga banorët e SHBA.
