Një fakt vërtet tronditës ka dalë në dritë nga avokati dhe aktivisti Adriatik Lapaj, i cili ka folur në lidhje me vendimin e paligjshëm të Bashkisë së Tiranës për të prishur godinën e Teatrit Kombëtar.
Sipas Lapajt, bashkia ka marrë nën pronësi vetëm truallin dhe godinën e Teatrit Eksperimental, por jo atë të godinës së Teatrit Kombëtar. Rrjedhimisht shembja e tij është e jashtëligjshme, ndaj ai u shpreh se me dokumentet e duhura do t’i drejtohet SPAK-ut:
“Bashkia e Tiranës nuk është bërë asnjëherë pronare e asaj godine dhe ky është një ndër faktet e reja që ne do nxjerrim. Aty ka pasur 2 godina, ndërsa bashkia e Tiranës është bërë pronare e vetëm njerëz godinë, me sipërfaqe 1126 metra katrorë. Ndërkohë që godina tjetër që është mbi 2000 e ca metra katrorë. Të dyja këto godina janë mbi 3000 metra katrorë ndërtim, ndërsa bashkia është bërë pronare me VKM vetëm e 1126 metra katrorë. Këshilli bashkiak ka marrë një vendim për një pronë që nuk e kishte në pronësi”.
Po ashtu, Lapaj theksoi atë që prej ditësh AMT ka vënë në dukje, për 3 nga 5 ekspertët e Institutit të Ndërtimit që vlerësuan godinën e Teatrit në 2018-n. Ata nuk kanë qenë fare te kjo godinë.
“Ndërkohë, më datë 13 maj 2020, pas kalimit me VKM të pronësisë te bashkia, kryetari i bashkisë së Tiranës, i drejtohet me një shkresë Institutit të Ndërtimit me një shkresë për vlerësimin teknik të godinës. Në bazë të kësaj shkrese është marrë vendimi i këshillit bashkiak. Kjo shkresë është firmosur nga 5 ekspertë, dy nga të cilët kanë qenë të Teatri i vitit 2018, ndërkohë 3 prej tyre nuk kanë qenë në terren, ndërkohë që në 2020 nuk kanë qenë në aktin e dytë të ekspertizës. Ky është shpërdorim detyre. Këta nuk kanë qenë te godina fare se ishte e uzurpuar”.
Prishja e Teatrit Kombëtar ishte një vendim i paprecedent dhe bëri jehonë në mbarë vendin për mënyrën sesi bashkia reagoi pas 2 viteve rezistencë nga Aleanca për Mbrojtjen e Teatrit. Vendimi i hapi rrugën një sërë protestave në vend nga artistë, aktivistë e qytetarë!
/ORANEWS
