Pak minuta mbas lajmit shokues të sulmit ndaj shtëpisë së gazetares së “News 24”, Klodiana Lala, ka ardhur reagimi i parë nga politika.
Kreu i qeverisë, Edi Rama, e ka quajtur sulmin një barbari të patolerueshme ndërsa ka kërkuar zbardhjen e menjëhershme të ngjarjes dhe ndëshkimin e autorëve.
Rama shpreh gjtihashtu të gjithë mbështetjen e tij ndaj gazetares Lala në këtë moment kritik.
“E patolerueshme barbaria mbi shtëpinë e gazetares Klodiana Lala! Ngjarja duhet zbardhur sa më parë dhe strukturat e shtetit janë të angazhuara maksimalisht. Mbështes e inkurajoj Klodianën në këtë moment kritik dhe pres me padurim ndëshkimin e keqbërësve”, shkruan Rama.
Gazetarja është telefonuar edhe nga Presidenti i Republikës, Ilir Meta, i cili i shprehu Lalës solidaritet të plotë dhe e inkurajoi të vijojë misionin e saj, pa u trembur dhe shantazhuar nga askush.
“Po kështu inkurajoj organet e sundimit të ligjit të hetojnë në mënyrë të plotë dhe shteruese, këtë ngjarje të rëndë, e të venë para ligjit këdo që qëndron pas saj. Liria e medias është kusht i pazëvendësueshëm për garantimin e të drejtave të njeriut në një shoqëri demokratike”, nënvizoi Presidenti Meta.
Banesa e prindërve të gazetares Klodiana Lala u sulmua me armë rreth orës 3:00 të mëngjesit nga persona ende të paidentifikuar.
Në banesë ndodheshin 8 persona, përfshi dy vajzat e mitura të gazetares. Kjo e fundit kishte qëndruar në banesë deri në orët e vona ndërsa më pas ishte larguar me bashkëshortin. Sulmi dyshohet të ketë ndodhur për shkak të detyrës.
