Teksa të gjitha baret, lokalet dhe restorantet në vend janë në kushte mbijetese nga pandemia, askush nuk po bën asgjë për t’ua lehtësuar sado pak vështirësitë e tyre financiare, përkundrazi.
Pjesa më e madhe e restoranteve në vend të cilat kanë marrë ambientin me qira, po hasin mjaft probleme në sigurimin e të ardhurave mjaftueshëm sa për të paguar qiranë, punonjësit apo të bëjnë furnizimin. Shteti gjithashtu nuk ka bërë asnjë hap, për reduktimin e TVSH-së, shtyrjen e taksave, dhënien e kredive të buta, apo minimumi mbulimin e këtyre qirave.
Kreu i Shoqatës së Bareve dhe Restoranteve në vend, Enri Jahaj, tregon për iconstyle.al se shumë biznese po konsiderojnë mbylljen, pasi ju kërkohet qira e plotë, në të kundërt duhet të ndërpresin kontratën dhe të lirojnë ambientin.
“Të gjithë me qira i kemi. Shumë pak i kanë të tyret dhe ju kërkojnë qira të plotë ose në të kundërt largim apo ndërprerje të kontratës së qerasë”, shprehet Jahaj për situatën në vend.
Rënie në masën 90%, bizneset buzë grminës!
Ne folëm personalisht me pronarin e lokalit “Charles” në ish-Bllok, Arben Lala, për të kuptuar sesi është situata sot, 3 muaj pas rihapjes në 18 maj dhe gjendja sipas tij është “në pikë të hallit”.
“Katastrofë, më keq nuk ka ku shkon. Në një rënie deri në 90%, deri në këtë pikë. S’e di sesi, por përveç situatës financiare të dobët dhe bllokimit të njerëzve nga jashtë, është dhe pjesa tjetër, se duke qenë lokal specifik muzikor, mbas orës 20:00 s’ka as muzikë dhe penalizohemi”.
Lala tregoi se lëshime për qiranë janë bërë vetën në dy muajt e parë të kohës së izolimit, kur ka paguar 50% të vlerës për marsin dhe prillin, por tani askush nuk toleron. Me hapjen e biznesit, atij i duhet të paguajë qiranë e plotë dhe rrjedhimisht ka shkurtuar edhe numrin e personelit:
“Qiratë në Bllok janë në ekstrem. Qiraja na kërkohet e plotë, vetëm në 2 muajt e parë patëm një mirëkuptim, dhe me thënë të drejtën s’ta ka njeri për borxh. Kam pasur 30 punëtorë tani kam 12 punëtorë. Dy muajt e parë kam paguar gjysmën e qirasë”.
“Policia lëshime në bregdet, por ne këtu në Tiranë, s’guxojmë”
I pyetur për bizneset e mëdha në bregdet që ia hedhin paq gjobave të policisë me muzikën pas orës 20:00 (lexo këtu), pas lëshimeve të këtyre të fundit, Lala u shpreh se nuk do të guxonte kurrë këtu në Tiranë të bënte një shkelje të tillë, nga frika se i bllokojnë aktivitetin.
“Andej bëhen lëshime, por ne s’guxojmë të bëjmë këto gjëra. Edhe sikur të guxoj një herë, dy herë, të mbyllin një sy, nuk mund ta bëj, sepse të bllokojnë pastaj”.
https://www.instagram.com/p/CESM-ggg7xW/
Ai shprehet se në periudhë vështirësie , është menduar edhe marrja e kredisë por dilema e madhe është: A do të mund t’i shlyejë dot këto para apo do të shkojë drejt falimentimit?
“Ne mund të marrim dhe kredi por këto lekë a do të shlyhen? Se në momentin që nuk do të shlyhen do falimentosh është e sigurt. Jo vetëm t’i paguajmë shtetit dhe ai të mos bëjë gjë. Është e vërtetuar që t’i ke gjithë jetën që paguan 2, 3, ose 4 mln lekë në muaj dhe në fund vjen një ditë që të flakin. Prandaj ekziston ai mendimi që, ‘ku të gjesh ta vjedhësh këtë shtet’, në kuptimin që s’mendon njeri për ty. Jemi në pikë të hallit, dhe kur flas për veten, kam përshtypjen që ka shumë të tjerë që mezi mbijetojnë”.
Çfarë kërkojnë bizneset
Enri Jahaj propozon që të bëhet një pagesë prej të paktën 50 % për të gjithë kategorinë që janë mbyllur, nga Disko-t e lokalet e muzikës te restorantet etj. Gjithashtu kërkohet ulja e TVSH-së dhe heqja e hapësirës publike deri sa të mbaroje kjo gjendje:
“Reduktim i TVSH-së në masën e hotelerisë pra 6 %, është një ndër kërkesat, pasi kjo do i jepte një shtysë sektorit dhe nuk do kishim pse të rrisnim çmimet; shtyrjen e te gjitha llojeve te taksave deri ne mars 2021; Fillimin e dhënieve të kredive të buta për kapital qarkullues pasi deri tani nuk kanë filluar ende dhe hartimin e një plani strategjik për rimëkëmbjen e sektorit”.
Mënyra ka plot për të kontribuuar në këtë moment krize për të gjithë bizneset në vështirësi, që nga rimbursimi i pagave të punonjësve apo te paketat ndihmëse që do të ishin një stimulim i mirë në këtë periudhë.
“Minimumi i minimumit kërkojmë të bëhet një ndërhyrje te qiratë. E dyta të bëhet një rimbursim për të marrë veten. Shteti mund të japë një paketë për bizneset në baze të punëtorëve. Variante ka por duhet marrë një paketë dhe t’i jepet një vlerë x, dhe e di biznesi vetë sesi e përdor. Edhe ca rimbursime rrogash për punëtorë, minimumi të hiqet ndonjë siguracion”, u shpreh Lala.
Muajt në vijim parashikohen akoma më vështirë pasi nuk ka pasur turistë dhe me gjendjen e deritanishme, klientët kanë filluar të kursejnë e të përgatiten për periudhën më të vështirë që pritet të vijë shtator, tetor.
/Iconstyle.al
