Vetëm para pak minutash një prind nga Mitrovica ka deklaruar të vdekur djalin e tij 15 – vjeçar, i cili ndërkohë ishte në sallën e operacionit dhe fatmirësisht ka shpëtuar.
I mituri me inicialet A.B., nga Mitrovica për rreth 15 minuta u shpall i vdekur me një njoftim të rremë në Facebook nga babai i tij.
M.B., nga veriu i Mitrovicës, njoftoi nëpërmjet një statusi në Facebook, se djali i tij që ra në pishinë kishte ndërruar jetë, por pas pak minutash statusi i tij u fshi, pasi djali ishte akoma gjallë.
Mjekët arritën ta shpëtonin 15 – vjeçarin dhe tani ndodhet në koma.
Ndërkohë i ati i cili publikoi lajmin ka thënë për gazetën “Express” se u ngut me këtë lajm dhe se e ka shkruar njoftimin për shkak të telefonatave të shumta që i kanë bërë të afërmit për t’u interesuar rreth shëndetit të djalit.
Gjithashtu zyrtarë të policisë rajonale të Mitrovicës kanë konfirmuar se djali është gjallë dhe gjendja e tij shëndetësore e djalit është stabilizuar.
Mediat dje kanë raportuar se i mituri, pas zhytjes në pishinë nuk ka mundur të dalë më, por është nxjerrë nga të pranishmit në gjendje të rëndë dhe dyshohej se kishte pësuar gjakderdhje të brendshme.
Pas nxjerrjes nga uji, ai ishte dërguar urgjentisht në QKUK për trajtim mjekësor.
