Pak ditë më parë, disa turistë spanjollë u terrorizuan nga pronari shqiptar i një restoranti në Porto Palermo.
Pasi spanjollët u larguan pa paguar, të pakënaqur nga shërbimi në restorant, pronari i lokalit, Mihal Kokëdhima, iu hodh me trup furgonit ku udhëtonin turistët, duke tentuar të thyejë xhamin e përparmë në mënyrë që të godiste pasagjerët.
Pavarësisht se u gjakos, Kokëdhima nuk u dorëzua deri në momentin që vendosi të zbriste vetë nga makina.
Video e tij ka bërë xhiron e rrjetit, ndërsa ai vetë u arrestua nga policia dhe u dënua me burg nga gjykata e Vlorës.
Sipas “Report TV”, turisti spanjoll, familja e të cilit u sulmua nga shqiptari, është një biznesmen shumë i fuqishëm në Spanjë.
Ai quhet Eugenio Galdon Brugarolas dhe është themeluesi i komapanisë ONO, e cila ofron shërbim telefonik, televiziv dhe internet.
Gjithashtu, Brugarolas ka mbajtur postin e rëndësishëm në administratë, si shef i kabinetit presidencial.
Nga viti 1983, deri në vitin 1997, ai ka qenë drejtues i disa prej grupeve më të mëdha mediatike në Spanjë, si “Cadena Ser”, “Grupo Prisa” dhe “Cadena COPE”.
Që prej vitit 1992, ai është president dhe aksioneri kryesor i “Multitel”, biznes i medias dhe telekomunikacionit në Spanjë.
Brugarolas zë vendin e 139-të në listën e 300 njerëzve më të pasur në Spanjë, pasuri e cila kap shifrën 300 milionë euro.
