Tetori është një muaj i trishtë për Beatrix Ramosajn, sepse lidhet me një nga ngjarjet më të trishta që ka shënjuar jetën e saj. Bëhet fjalë për ndarjen nga jeta të babait të saj, momenti më i vështirë për këngëtaren, për të cilin ajo nuk lë rast pa folur.
Sot ajo ka treguar se pas disa ditësh bëhen plot 10 vite nga koha kur i ati ndërroi jetë dhe dhimbja për të duket se vazhdon të mbetet e njëjtë. Beatrix është shprehur se gjithçka ja ka kujtuar një kalendar dhe se këto ditë babai është i vetmi mendim që i kalon nëpër mendje.
“Po shikoja kalendarin këtë mëngjes dhe po më bënte të ndihesha shumë e trishtuar… nuk mund ta gjeja arsyen pse ndihesha ashtu. Thjesht e dija që kishte diçka që më mungonte. Po përpiqesha shumë fort ta kujtoja. Në 9 tetor bëhen 10 vite nga dita kur babai im u nda nga jeta. Tani kjo është gjithçka që mendoj. Më mungon shumë”, ka shkruar Ramosaj shoqëruar me disa foto të vjetra të babait.
Megjithatë, Beatrix ka treguar gjithmonë se kjo ngjarje ka ndikuar në forcimin e lidhjes me pjesëtarët e tjerë të familjes, vëllain Albanin dhe nënën e tyre Antigonen.
