Shumë drama në frontin e jetesës luksoze të familjes Kardashian këtë fundjavë. Fillimisht, ishte një foto e Kylie Jenner-it me gjithë supermakinat e saj në Instagram ajo që shkaktoi reagime plot pakënaqësi tek ndjekësit në Instagram, të cilët e akuzuan se po përpiqej t’u bënte karshillëk atyre që s’kanë bukë të hanë (disa madje shkruajtën: “Çohu Enver”. Shaka kjo.)
Sidoqoftë, as Khloe Kardashian nuk u shpëtoi kritikave të ashpra pasi postoi një video të vajzës 1 vjeçe True duke luajtur me një makinë lodër Bentley, mbi të cilën shkruhet: “Klubi i makinave të luksit për fëmijë”. E vërteta është se kjo video ta bën zemrën copë- copë, aq e lezetshme është:
Por, ndjekësit nuk janë dakord me Khloe-n që t’i mësojë së bijës makina e gjëra të tilla, aq më pak t’i publikojë ato në Instagram. Puna është se Khloe s’ia përtoi e iu përgjigj një komentuesi i cili i shkruante:
“Bukur shumë, një tjetër Kardashian mbi një Bentley. Ju s’e kuptoni sesi i ngjajnë pjesës tjetër të botës shpenzimet tuaja të tepruara. E kam adhuruar historinë e familjes suaj por tani s’e duroj dot të shikoj si i prishni paratë për materializëm të pavlerë. Është e trishtë.”
Khloe iu përgjigj:
“Hmmm… Ti e di që ky nuk është një Bentley i vërtetë, apo jo? Është një lodër; s’ka arsye të mërzitesh për një bebe mbi një makinë lodër. Gjithsesi më vjen keq që po ndihesh kështu dhe të uroj një fundjavë fantastike! Fokusohu tek gjërat që të bëjnë të lumtur! Qesh!”
