Sot në emisionin “Live from Tirana” të Top Albania Radio ishte i ftuar në studio ish-banori i “Big Brother”, Arjon Muça për të folur sigurisht rreth “Big Brother VIP”, program i cili ka gjithë vëmendjen e momentit.
Arjoni njihet për natyrën e tij të drejtpërdrejtë e nuk kishte si të ndodhte ndryshe as kësaj here.
Ish-banori tregon të preferuarin e tij, madje edhe “marrëdhënien” e tij të preferuar brenda shtëpisë:
E nisa me entuziasëm për Ilirin duke e njohur më parë te formati i “Dancing with the Stars” dhe mendoj se në këto momente është pak i zbehtë. Diçka ka ndodhur tek ai. Dyshja Iliri-Sabiani treguan që televizivisht dy çuna mund të duhen pastër. Ata dy njerëz duhen dhe kjo është një gjë shumë e bukur dhe nuk ka lidhje çfarë gjinie kanë. Në këtë rast pamë dy njerëz që e vlerësuan shumë njëri tjetrin aq sa Sabiani i tha Ilirit: ‘Ti je 100 mijë euroshi im’. Një marrëdhënie solide dhe e bukur.
Arjoni gjithashtu foli pak edhe për personazhet e tjerë, nga të cilët nuk është surprizuar aspak.
Jo askush (nuk më ka surprizuar), ishin të gjithë të pritshëm në mënyrën si kanë vepruar. Besoj se secili nga ata ka dalë personazhi që është duke përfshirë Fifin me atë karakterin e saj të fortë dhe shpërthyes. Triksa është një vajzë e butë, e brishtë, Donaldi një karakter i fortë. Mund të të them që nuk e kisha parë kurrë Donaldin pa Romeon sepse zakonisht vijnë paket. Unë i kam në shoqërinë time por gjithmonë me njëri-tjetrin. Surpriza mund të them se ishte Donaldi si element unik pa vëllain e tij.
