Valentina Arazi, personi i fundit që pa gjallë kunatën e saj, Almën dhe tre fëmijët e saj është thirrur sërish sot në Prokurori për të dhënë dëshminë e saj.
Dëshmia e saj ka qenë dyshuese nga ana e autoriteteve, referuar pamjeve të takimit të saj me Almën dhe tre të miturit pak para fundit tragjik drejt lumit Buna. Valentina Arazi, u paraqit në Prokurori e shoqëruar nga familjaret e familjes Arrazi, ndërkohë që kunati i saj është ende në burg.
Ergys Arazi ndodhet i arrestuar në burgun e Reçit për akuzën “shkaktim të vetëvrasjes”, pas tragjedisë së ndodhur më 2 maj në Shkodër, ku bashkëshortja e tij Alma Arazi dyshohet se u vetëvra duke u hedhur në lumin Buna, bashkë me 3 fëmijët e saj të mitur.
Çfarë dimë deri më tani për ngjarjen?
Ngjarja e rëndë ka ndodhur më 2 maj. Alma Arazi dyshohet se u vetëvra duke u hedhur në lumin Buna, bashkë me 3 fëmijët e saj të mitur, 2 vajza dhe 1 djalë. I dyshuar kryesor për krimin e rëndë është bashkëshorti i Alma Arazit, Ergys Arazi, babai i tre fëmijëve. Ai akuzohet se ka ushtruar dhunë në familje, gjë që ka shtyrë 39-vjeçaren drejt aktit të vetëflijimit. Ndërkohë që sherri në familje kishte nisur prej kohësh, pasi Alma Arazi zbuloi tradhtinë e bashkëshortit.
Deri më tani, 31-vjeçari ka mohuar të gjitha akuzat duke u mbrojtur me pretendimin se e shoqja vuante nga probleme të shëndetit mendor. Familjarët pretendojnë se Arazi kishte një lidhje tjetër jashtëmartesore, detaj që është marrë si pistë hetimi nga autoritetet.
