Një efektive e policisë shqiptare ka humbur 4 gishtat e njërës dorë, pasi u lëndua nga një kapsollë që u hodh gjatë protestës së banorëve që preken nga projekti i Unazës së Madhe në Tiranë.
“BalkanWeb” raporton se të paktën 12 punonjës policie po marrin trajtim mjekësor në spitalin e Traumës, mes të cilëve një punonjëse policie, së cilës kapsolla i ka prerë 4 gishtat e njërës dorë, dhe një tjetër efektiv ka humbur dëgjimin në njërin vesh.
Protesta e banorëve që kërkojnë dëmshpërblimin për projektin e Unazës së Madhe, u përshkallëzua sot në përdorimin e mjeteve të forta dhe piroteknike, hedhur nga tubuesit mbi punonjësit e Policisë.
Në videon e mëposhtme shfaqen pamjet nga spitali, pas mbërritjes së efektivëve të plagosur.
Policia e Shtetit u bën thirrje protestuesve dhe përfaqësuese politikë për distancim nga dhuna dhe nga goditjet ndaj punonjësve të rendit. Ndërkohë, prokuroria ka nisur hetimet për protestën e dhunshme që përfundoi në plagosjen e uniformave blu.
