Shifra të frikshme janë regjistruar sot në Maqedoninë e Veriut ku janë shënuar 11 viktima në 24 orët e fundit. Sipas informacioneve kanë humbur jetën 8 pacientë nga Shkupi, një nga Kumanova, një nga Tetova dhe një nga Shtipi.
Ministria e Shëndetësisë bëri të ditur se gjatë 24 orëve të fundit janë bërë 1.364 testime dhe janë regjistruar 185 raste të reja me virus.
Shpërndarja gjeografike e të infektuarve është si vijon: Shkupi ka 96, Kumanova 2, Dibra 18, Shtipi 4, Tetova 14, Struga 20, Velesi 2, Manastiri 2, Ohri 7, Kavadar 2, Gostivar 2, Kriva Pallanka dhe Probishtipi me nga 1, Shën Nikolla 2, Kërçova 3 dhe Resnja 8, njofton Telegrafi Maqedoni.
Numri i përgjithshëm i të prekurve që nga fillimi i epidemisë është 5.005, numri i pacientëve të shëruar është 1.904, numri i të vdekurve është 233 ndërsa momentalisht në Maqedoninë e Veriut ka 2.868 raste aktive.
E megjithatë, pavarësisht bilancit negativ, qeveria nuk parashikon rikthimin e masave, madje kanë vazhduar me lehtësimin e tyre Kafenetë dhe objektet e hotelerisë në vend, nga e diela do të punojnë sipas orarit të punës të përcaktuar në licencat e tyre të punës, apo deri në mesnatë, ndërsa gjatë fundjavave deri në orën 01:00.
/Telegrafi
